Serokwezîrê Herêma Kurdistanê Mesrûr Barzanî di derbarê mûçe, êrîşên dron û mûşekan, hinardekirin petrolê û rewşa navxwe ya Başûrê Kurdistanê de, daxuyanî da.
Serokwezîrê Herêma Kurdistanê li ser êrîşan wiha got:
"Mixabin bi mûşek û dronan, êrîş li ser Kurdistanê hatiye kirin.
Ev yek ti hincetan qebûl nake.
Herêma Kurdistanê ne beşek ji vî şerî ye û em ji Hikûmeta Federal a Îraqê dixwazin ku rê li ber van êrîşan bigire."
Mesrûr Barzanî wiha domand:
"Hikûmeta Federal berpirsyar e ku êrîşên komên deryasayî rawestîne, ji ber ku beşek ji wan muçeyên xwe ji hikûmeta Îraqê distînin."
Her wiha Mesrûr spasiya hêzên Hevpeymaniya Navneteweyî ya li Dijî DAIŞ'ê kir ku mûşek û dron xistine xwarê û wiha lê zêde kir:
"Roleke wan a gelekî baş hebû, bi taybetî li Hewlêrê."
Mesrûr Barzanî di derbarê hinardekirina petrolê ya bi rêya aboriya Herêma Kurdistanê re jî got:
"Em wekî Herêma Kurdistanê ji her kesî zêdetir li ser aboriya Herêma Kurdistanê, muçe û debara jiyana xelkê bi fikar in.
Em dubare dikin ku Herêma Kurdistanê li gel wê yekê ye ku petrol were hinartin."
Serokwezîr Barzanî bal kişand ser dilgiraniyên Bexdayê û got ku Başûrê Kurdistan ne asteng e û ew tenê dixwazin ku garantî hebe da ku ew karibin ji qadên xwe jî petrolê hinarde bikin.
Serokwezîrê Herêma Kurdistanê diyar kir ku divê Bexda mafên xelkê Herêma Kurdistanê bide û ambargoya heyî rake.
Di dawiya daxuyaniyê de, Serokwezîrê Herêma Kurdistanê Mesrûr Barzanî sersaxî ji malbatên şehîdan re xwest û da zanîn ku ji bo parastina xelkê Kurdistanê çi ji destê wan were, wê bikin.
