Duh li navenda Hevgirtina Rewşenbîrên Rojavayê Kurdistanê (HRRK) ya bajarê Qamişlo derbarê pêşeroja Sûriyê de civîna diyalogê bi serenavê "Sûriya nû û parastina pirrengiyê" hat lidarxistin.
Kesayetên siyasî, rewşenbîrî, wêjeyî û rojnamevan beşdarî civînê bibûn.
"Danezana destûrî tu carî pirrengiya li Sûriyê nahewîne"
Destpêkê berpirsê Rêxistina Demokratîk a Asûrî Gabrîel Moşî eşkere kir ku pêvajoya demkî ya Sûriyê ji ber paşguhkirina hêzên siyasî û pêkhateyên Sûriyê têk çûye û got: "Danezana destûrî tu carî pirrengiya li Sûriyê nahewîne."
Moşî daxwaz kir ku qanûn werin rastkirin û danûstandin bi pêkhateyên Sûriyê re were kirin da ku danezana destûrî jî, were rastkirin û hikumeteke giştî were avakirin."
''Paşguhkirina pêkhateyên Sûriyê xaleke ne erênî ye''
Endamê Desteya Serokatiya ENKS'ê Silêman Oso jî diyar kir ku dûrxistin û paşguhkirina partiyên siyasî û pêkhateyên Sûriyê xaleke ne erênî ye û got: "Ev yek di komkujiyên perava Sûriyê û Siwêdayê de xuya dibe."
Oso diyar kir ku hilbijartinên ku Hikumeta Veguhêz dike pêk bîne, di rastiyê de erkdarkirine û got:
"Konferansa Yekrêzî û Yekhelwesta Kurdî ya 26'ê Nîsanê destkeftiyeke neteweyî ji bo gelê Kurd e. Ev yekîtî ne li dijî tu dewletên derdora me ne û ne li dijî tu pêkhateyên Sûriyê ne. Em teqeziyê bi Sûriya bedew a xwedî mûzaîk û çareserkirina pirsgirêka Kurd didin."
''Hilbijartin parlementoyê derveyî îradeya gelê Sûriyê ye''
Hevseroka Partiya Yekîtiya Demokratîk (PYD) û hevseroka şandeya Kurdî ya danûstandinên bi Şamê re Perwîn Yûsif got ku ev hilbijartin derveyî îradeya gelê Sûriyê û herêmên Bakur û Rojhilatê Sûriyê ye û got: "Herêmên Bakur û Rojhilatê Sûriyê beşeke Sûriyê ne."
Piştre beşdaran teqezî bi girîngiya parastina pirrengiya herêmê da û dan zanîn ku Hikumeta Veguhêz roleke mezin daye komên çekdar ên ku li Efrîn, Girê Spî û Serêkaniyê sûc pêk anîne û ev jî şaşî ye.
Beşdaran dan xuyakirin ku ne tenê Bakur û Rojhilatê Sûriyê, lê belê tevahiya gelê Sûriyê (durzi, elewî û pêkhateyên din) jî hatine paşguhkirin.