Bi boneya salvegera 52`yan a şehîdbûna Leyla Qasim û hevalên wê, gelek aliyan peyam parve kirin.
Serokê PDK`ê Mesûd Barzanî li ser hesabê xwe yê X`ê bi boneya salvegera şehîdbûna Leyla Qasim û hevalên wê, peyamek belav kir û wiha got:
"Şehîd Leyla Qasim û hevalên wê ji bo azadî û rûmeta gelê xwe, bi wêrekî canê xwe gorî kirin.
Leyla Qasim û hevalên wê ji bo hemû azadîxwazên Kurdistanê bûn mînak û sembola berxwedanê.
Em silavan ji rihê wan ê pak û rihê hemû şehîdên rêya azadiyê re dişînin."
Nêçîrvan Barzanî: Leyla Qasim pêşenga jinên Kurdistanê bû
Her wiha Serokê Herêma Başûrê Kurdistanê Nêçîrvan Barzanî jî, bi boneya şehîdbûna Leyla Qasim û hevalên wê peyamek belav kir û wiha axivî:
"Leyla Qasim ne tenê semboleke neteweyî ye, ew di heman demê de meşaleya hişyariyê û pêşenga jinên Kurdistanî bû.
Leyla Qasim bi berxwedana xwe ya bêhempa ya li girtîgehê û li ber sêdarê, îsbat kir ku jina Kurd xwedî îradeyeke polayî ye û amade ye ku di rêya azadî û rûmeta gelê xwe de canê xwe gorî bike.”
TJA: Leyla Qasim Bûka Kurdistanê û nemira doza azadiyê ye
Li Bakurê Kurdistanê Tevgera Jinên Azad (TJA) bi daxuyaniyekê jina şoreşger û pêşeng a Kurd Leyla Qasim bi bîr anî.
TJAyê da zanîn ku Leyla Qasim di dîroka Kurdistanê de wekî “Bûka Kurdistanê” û nemira doza azadiyê tê naskirin.
Tevgera Jinên Azad di daxuyaniya xwe de, Leyla Qasim weke sembola vîna neteslîmbûnê pênase kir û wiha anî ziman:
“Leyla Qasim, di têkoşîna azadiya gelê Kurd de yek ji sembolên vîna neteslîmbûnê ye.
Em bi rêzdarî û minetdarî Leyla Qasim bi bîr tînin.
Ew ê di berxwedana me de her bijî.”
Mazlûm Ebdî: Em ê li ser şopa Bûka Kurdistanê têbikoşin
Fermandarê giştî yê QSD`ê Mazlûm Ebdî jî li ser hesabê xwe yê Xê Leyla Qasim bi bîr anî û got:
“Leyla Qasim, keça Başûrê Kurdistanê, mînaka serbilindî û serfiraziya jina Kurd e, ku bi hevalên xwe re rûmeta Kurdan parast.
Em Leyla û hemû jinên ku di rêya azadiyê de canê xwe dane, bi bîr tînin.
Em ê li ser şopa “Bûka Kurdistanê” têkoşîna azadiyê bidomînin.”
