Ji destpêka şerê di navbera Amerîka-Îsraîl û Îranê de di 28ê sibatê de, li van welatan gelek qurbanî û birîndar çêbû ne.
Wezareta Tenduristiyê ya Îsraîlê, da xuyakirin ku ji dema operasyona li dijî Îranê, 6 hezar û 594 kesên birîndar veguhestine nexweşxaneyan.
Ji sibeha înî û vir ve 125 birîndar li nexweşxaneyan tên dermankirin
Li gorî agahiyên ku ji aliyê Jewish News Syndicate ve hatiye weşandin, ji sibeha înê û vir ve 125 birîndar li nexweşxaneyan tên dermankirin.
Hate diyarkirin ku rewşa 2 birîndaran krîtîk e, 14 jî bi giranî birîndar bûne û 24 di asta navîn de ne û 79 jî sivik birîndar in.
Her wiha Wezaretê diyar kir ku di nava 24 saetên dawî de 148 birîndar rakirine nexweşxaneyan.
Hrana: Li Îranê û Rojhilatê Kurdistanê di nava 24 saetan de 275 êrîş pêk hatin
Li aliyekî din jî ajansa nûçeyan a mafên mirovan (Hrana), ragihand ku di nava 24 saetên dawî de li 16 bajarên Îranê û Rojhilatê Kurdistanê 275 êrîş pêk hatine.
Ajansa Nûçeyan a Hrana ragihand ku di êrîşan de 22 baregehên leşkerî, navendên Muhafizên Şoreşê, baregehên Besîc, balafirgehên leşkerî, navenda polîsan, bîrên petrolê û tesîsên enerjiyê yên nukleerî hatine hedef girtin.
Li gorî daneyên ne fermî yên ji hêla ajansa Hrana’yê ve hatine weşandin, ji destpêka şerê Amerîka-Îsraîl û Îranê ve di encama êrîşên li ser Îranê û bajarên Rojhilatê Kurdistanê de 1.606 kes bûne qurbanî ku di nava wan de 244 zarok in.
