Duh li bajarê Hesekê yê Bakûr û Rojhilatê Sûriyê, jinên Kongra Star û jinên Kombûna Zenûbiyayê di bin navê “Hevgirtina jinan bingeha avakirina edalet û demokrasiyê di Sûriyeke nenavendî û yekgirtî de” konferansek li dar xistin.
Di konfernasê de zêdetirî 600 jin amade bûn
Di konferansê de, zêdetirî 600 jinên ji hemû pêkhateyên Kurd, Ereb, Suriyan, Ermen, Aşûr, Durzî, Elewî û Çerkes amade bûn û hin jinên derveyî welat bi rêya onlin beşdar bûn.
Ji bo gotûbêjkirina avakirina Sûriyeke nû ku jin di her qadê de, xwedî rol û misiyon be, ev konferans hat lidarxistin.
Daxwaza parastina mafê jinê di destûra Sûriyê de hat kirin
Konferans bi nîqaşên li ser yekhelwesta jinan li hemberî binpêkirinên li hundirê Sûriyê û mafên wan di destûrê de were misorger kirin , bi dawî bû.
Encamnameya konferansê ji 18 xalan pêk tê
Encamnameya konferansê 18 xalan li xwe digire, di nav de:
Banga lidarxistina konferanseke berfireh ji bo hemû jinên Sûriyê hatiye kirin, ew jî bi armanca mafê jinan di destûrê de bê misogerkirin.
Avakirina Sûriyeke demokrat û nenavendî yek ji daxwazaên jinan bû
Her wiha daxwaza avakirina Sûriyeke demokrat û nenavendî hatiye kirin ku tê de mafê tevahiya pêkhateyan wekhev parastî be.
"Rêjeya jinan di sazî û postên serokatiyê de 50% be"
Jinên ku li Hesekê gihiştin hev, di encamnameya konferansa xwe de ev yek jî, destnîşan kirin ku divê rêjeya jinan di hemû saziyên hikûmetê û postên serokatiyê de, ji sedî 50 kêmtir nebe.
Di heman demê de jî, tedbîrên bi bandor ji bo parastina siyasetmedar û rêberên jin ji kampanyayên medyayê yên organîzekirî, werin girtin.
Piştgiriya vegera koçberên Efrîn û Serê Kaniyê hat kirin
Jinên ku li Hesekê civiyan, piştgirya xwe ji bo vegera koçberên Efrîn, Serê Kaniyê û Girê Spî bo nav bajarên wan nîşan dan û bal kişandin ser giringiya hêzên parastina jinan û rola wan a bi badnor di parastina civakê de.