Piştî ku di nav 48 saetan de nêzî 300 mîlîmetre baran bariya, binesaziya Bangkokê paytexta Taylandê, peyda nekir û rûbar û kanalên bajêr ser rijiyan. Waliyê Bangkokê, Şadşart Sîtîpûnt, bi daxuyaniyekê ragihand ku li hemû 50 navçeyên bajêr rewşa karesata giştî hatiye ragihandin da ku alîkariyên lezgîn zûtir bigihêjin xelkê.
Rê hatin girtin, asta avê gihîşt kemberê
Li gorî raporên herêmî, gelek otoban û şeqamên sereke yên bajêr bi temamî di bin avê de mane û erebe di nav avê de asê mane. Li taxên nizm û yên nêzî kanalan, asta avê gihîştiye asta kember û çokan. Welatiyên li wan deveran bi fikar in û rewşê dişibînin karesata lehiyê ya mezin a sala 2011’an. Saziyên dewletê dibistanên giştî wekî stargehên demkî vekirine û xeta metroyê (MRT) parkkirina erebeyan belaş kiriye da ku xelk wesayîtên xwe ji avê biparêzin.
Serokwezîr geşta xwe ya derve qut kir
Ji ber girîngiya rewşê, Serokwezîrê Taylandê Anûtîn Çanvîrakûl geşta xwe ya fermî ya li Londonê nîvco hişt û biryar da ku demildest vegere welat. Li aliyê din, Navenda Parastina li Dijî Lehiyê hişyariyek da şofêrên erebeyên piçûk ku dakevin 7 xalên krîtîk ên bajêr ên ku bi temamî hatine girtin.
Her çend stasyonên pompekirina avê bi kapasîteya xwe ya herî bilind (1200 metrekup di saniyeyê de) dixebitin jî, rayedar radigihînin ku heke baran raweste jî dê valakirina avê 2 heta 3 rojan bajêr bikişîne. Saziya Keşnasiyê hişyarî da ku dibe ku dawiya hefteyê jî baranên bi birûsk berdewam bikin.
