Konferansa 3'yemîn a Meclisa Jinan a Meclisa Malbatên Şehîdan bi dirûşmeya “Bi rihê şehîdên azadî, demokrasî û aştiyê mayînde bikin û azadiya fîzîkî ya Rêber Apo mîsoger bikin” dest pê kiriye.
Konferans bi amadebûna 400 delegeyan li Rimêlan tê lidarxistin
Konferans li Navenda Çand û Hunerê ya Aram Tîgran a bajarokê Rimêlanê yê Kantona Cizîrê bi beşdariya nêzî 400 delegeyên meclisê ji herêmên cuda yên Bakur û Rojhilatê Sûriyê tê lidarxistin.
Di konferansê de, li ser navê Meclisa Malbatên Şehîdan Sureya Hemo, bi navê Kongra Star Gulîstan Gulo û bi navê YPJ’ê fermandar Kurdistan Koçer axivîn.
Di axaftinan de bal kişandin li ser rola pêşeng a jinan di domandina rêya şehîdan û belavkirina nirxên azadî û wekheviyê de.
Her wiha qala keda şehîdan di parastina herêmê û têkbirina terorê de jî hat kirin.
Dê endamên nû bo Meclisê werin hilbijartin
Endama Kongra Star Elîf Hemo jî rewşa siyasî ya li Sûriyê û guhertinên li herêma Rojhilata Navîn şîrove kirin.
Di berdewamiya konferansê de, dê rapora xebatên 2 salên borî yên meclisê were xwendin, rêzikname were xwendin û nîqaşkirin.
Di heman demê de dê endamên nû yên meclisê werin hilbijartin.
