Xizmên Şêx Seîd, endam û nûnerên saziyên sivîl û partiyên siyasî di nav de, gelek kes beşdarî daxuyaniyê bûn.
Di daxuyaniyê de hat destnîşankirin ku têkoşîna Şêx Seîd û hevalên wî îro bûye bingeha daxwaza maf, azadî û rûmeta gelê Kurd.
Serokê Komeleya Şêx Seîd Mehmet Kasim Firat ku neviyê Şêx Seîd e, destpêkê axivî û bal kişand ser rûpelên dîrokî yên sala 1925’an.
Piştre rêveberê Komeleya Şêx Seîd Bawer Firat nivîsara daxuyaniyê xwend:
ÎNSIYATÎFA YEKÎTIYA DEMOKRATÎK DAXUYANÎ PARVE KIR
Înîsiyatîfa Yekîtiya Demokratîk bi boneya 101. salvegera komkujiya Şêx Seîd û hevalên wî, daxuyaniyek parve kir û got:
"Îtiraza gelê Kurd a di şexsiyeta Şêx Seîd Efendî de derket holê ku li dijî polîtîkayên înkar û asîmilasyonê bû, rastî êrîşeke mezin hat.
Bi behaneya serhildanê pêşeng û rûspiyên Kurd hatin desteserkirin, kuştin û sirgûnkirin
Şêx Seîd Efendî û 47 hevrêyên wî jî di 29'ê hezîrana 1925'an de li Qada Daxkapiya Amedê bi awayekî lezgîn hatin bidarvekirin."
KCK: EM Ê ARMANCÊN ŞÊX SEÎD Û HEVALÊN WÎ PÊK BÎNIN
Ji aliyê din ve, Hevserokatiya Konseya Rêveber a KCK'ê Şêx Seîd û hevalên wî bi minet û hurmet bi bîr anîn û got:
"Şêx Seîd û 48 hevalên wî beriya niha bi 101 salan li qada Deriyê Çiyê yê Amedê hatin bidarvekirin.
Em wan bi minet û hurmet bi bîr tînin û soza xwe ya ji bo bicihanîna hesreta wan a ji bo Kurdistana Azad dubare dikin.
Heta ku hesreta Şêx Seîd, Seyîd Riza û hevalên wan bên bicihanîn, wê têkoşîna azadiyê dewam bike."
KCK’ê di dawî de got ku egere em behsa pêvajoya aştiyê dikin, divê cihê Şêx Seîd û hevalên wî were eşkerekirin û bi nîşandana cihê wan, wê bê nîşandan ku dawî li polîtîkaya qirkirina Kurdan hatiye.
