Japonya li hemberê dewrîyeya balafirên Rûsya û Çînê helwesteke aktîf nîşan da.
Duh balafirên japon tevlî yên Amerîkayê li ser esmanên Deryaya Japonyayê firîyan.
Balafirên amerîkî yên tevlî dewrîyeya hevpar bûn, dikarin bombeyên nukleer jî hilgirin.
Wezareta parastinê ya japonê dîyar kir, 2 balafirên bomberanê B-52 yên Amerîkayê û 3 balafirên F-35 ên Japonyayê tevlî dewrîyeyê bûne.
Wezaretê di daxuyanîya îro de bi van gotinan biryardarîya Japonyayê nîşan da:
"Em biryardarîya xurt a Japonya û DYAyê piştrast dikin ku ew ê destûrê nedin bi darê zorê û bi awayekî yekalî statûko bê guherandin."
Ev jî nîşan dide, Japonya di rikeberîya dawî ya li rojavayê Pasîfîkê de paş ve gav navêje.
Duh Çîn û Rûsya li dora Japonyayê dewrîyeyeke hewayî pêk anîbûn.
Balafirên herdu welatan li esmanên Deryaya Japonyayê bi saetan firîyabûn.
Pekîn û Moskovayê di daxuyanîyên xwe de dewrîyeya hewayî wekî minawreyan nîşan dabûn.
Rûsya û Çînê alozîya li pasîfîkê mezin kiribûn
Dawîya vê hefteyê jî balafirên şer ên Çînê di dewrîyeke xwe ya li rojhilatê Japonyayê radarên balafireke japonyayê kilît kiribûn.
Kilîtkirina radar a di minawreyên hewayî de wekî provokasyoneke cidî tê qebûlkirin.
Japonyayê ji devê serfermandarê artêşê Hiroaki Uchikura wiha bertek nîşanî dabû:
"Em ji alîyê ewlehîya Japonyayê ve vê bûyerê pir cidî dibînin."
