Îro bi amadebûna şandeyeke ji Hikûmeta Herêma Kurdistanê, 13’emîn civîna Encûmena Wezarî ya Aborî ya Îraqê ji bo nîqaşkirina yek-kirina prosedûrên gumrikê hate lidarxistin.
Hat ragihandin ku her du alî li ser yek-kirina siyaseta gumrikê ya di navbera Îraq û Başûrê Kurdistanê de, bi taybetî di warê pênasekirina gumrikê û parastina berhemên navxweyî de, li hev kirine.
Her wiha biryar hatiye dayîn ku sîstema “Asecuda” li deriyên Başûrê Kurdistanê were bicihkirin.
Bi şertê ku çêkirina siyaseta gumrikê berpirsiyariya Hikûmeta Federal be û rêveberiya gumrikê bi hevbeşî di navbera her du hikûmetan de be.
Ji bo vê armancê, biryar hat dayîn ku bi şandeyeke teknîkî ya gumrika Başûrê Kurdistanê û tîma neteweyî ya Wezareta Darayî ya Îraqê re bicivin, da ku mekanîzmayên li gorî qanûnên derbasdar ên herêmê nîqaş bikin.
Fuad Husên, ku serokatiya civînê kir, got ku Îraq ji ber rewşa şer a li herêmê bi zehmetiyên ewlehî û aborî re rû bi rû ye û ji ber vê yekê, ev gav pêwîste.
Di heman demê de, Sekreterê Desteya Wezîran a Herêma Kurdistanê piştgiriya xwe ji bo gumrika elektronîkî nîşan da û tekezî li ser şefafî û zêdekirina dahatê kir.
Di dawiya daxuyaniyê de, encûmena aborî biryar da ku deriyê sînorî yê Tirêbîl wekî deriyeke sînorî yê fermî ji bo hawirdekirina zêr heta ku ambargoya hewayî ya ji ber operasyonên leşkerî were rakirin, were destnîşankirin.
