Serokê Giştî yê CHP'ê Ozgur Ozel îro di demjimêr 12.00'an de serdana Navenda Giştî ya DEM Partiyê kir û bi Hevserokên Giştî yên DEM Partiyê Tûlay Hatîmogullari û Tuncer Bakirhan re civiya.
Hevserokên Giştî yên DEM Partiyê Tulay Hatimogullarî û Tuncer Bakirhan ligel Serokê Giştî yê CHP'ê Ozgur Ozel, piştî hevdîtinê civîneke çapemeniyê ya hevpar li dar xistin.
Di civîna çapemeniyê de destpêkê Serokê Giştî yê CHP'ê Ozgur Ozel axivî û got:
"Sedema hevdîtina wan geşedanên di polîtîkayên hundir û derve de ne.
Me li ser bandorên aborî û siyasî yên şerê Îranê li ser Tirkiyê û şert û mercên aborî yên ku welatî tê de ne, dirêj dirêj axivîn.
Divê Tirkiyê di demeke kin û dirêj de tedbîran bigire."
Ozgur Ozel bal kişand ser şerê li Îranê û diyar kir ku tiştên ku di borî de qewimîne, wekî “xizanî, bêkarî û buhabûna kelûpelan” li welatiyan vegeriya ye.
Her wiha di der barê Pêvajoya Aştî û Civaka Demokratîk de jî Ozgur Ozel wiha got:
"Divê di vê mijarê de gav werin avêtin.
Em plan dikin ku di rojên pêş de bi Serokê Meclisê Numan Kurtulmuş re bicivin."
Hatîmogullarî: Divê gavên qanûnî bi lez werin avêtin
Hevseroka Giştî ya DEM Partiyê Tulay Hatimogullarî jî roja Rojnamegerên ku hatine Kuştin bi bîr xist û wiha domand:
"Musa Anter, Metin Goktepe, Gurbetelli Ersoz, Hrant Dink û hemû rojnamegerên ku hatine kuştin bi rêzdarî bi bîr tînim."
Tulay Hatîmogullarî destnîşan kir ku li Tirkiyê qeyraneke aboriyê ya pir kûr heye û li vî welatî mirov ji birçîna û xizaniyê dimirin.
Hevseroka Giştî ya DEM Partiyê got ku ji bo pêvajoyê divê pakêtên qanûnî û yasaya çarçoveyê bi lez werin amadekirin.
Tulay Hatîmogullarî di dawiyê de spasiya CHPê, bi taybetî Ozgur Ozel û Ekrem Îmamoglu kir ku ji destpêkê ve bi samîmiyet piştgirî dan pêvajoya aştî û civaka demokratîk.
