Di dema dawî de revandin û bikaranîna madeyên hişbir çiqas li herêmê kêm be jî pêk dihat.
Li hember wê Desteya Hundirîn a kantona Cizîrê bi daxuyaniyek nivîskî diyar kir ku wan li dijî komeke bazirganên hişbirê û kesên destên wan di kiryarên diziyê û revandinê de hene operasyonek ewlehiyê li dar xistiye.
Desteya Hundirîn a kantona Cizîrê eşkere kir ku operasyona ewlehiyê li gundê Kerhûk ê gundewarê Qamişloyê ya Bakur û Rojhilatê Sûriyê pêk hatiye.
"Firoşkarekî hişbirê hat kuştin û 4 jî hatin girtin"
Li gor Desteya Hundirîn a kantona Cizîrê dema serdegirtinê de, hêzên wan rastî êrişên çekdarî ya endamên komê hatine.
Di encamê de pevçûn çêbûye, firoşkarekî hişbirê hatiye kuştin û 4 jî hatine girtin.
Her wiha di daxuyaniya Desteya Hundirîn a kantona Cizîrê de wiha hate gotin:
"Di dema pevçûnan de, endamên komê zarok û jin wekî mertalên zindî bi kar anîn û ev yek bû sedem ku hêzên me ji bo parastina ewlehiya sivîlan bi awayekî demkî operasyonan rawestînin.
Piştre, şêx û eşîrên herêmê mudaxele kirin û soz dan ku 2 kesên mayî ji bo darizandinê radestî Hêzên Ewlekariya Hundirîn bikin"
