Serokwezîrê Brîtanyayê Keir Starmer, ragihand ku welatê wî ligel Fransayê, dê mîsyoneke pirneteweyî ji bo parastina rêyên keştîvaniya bazirganiyê li Tengava Hurmizê bi rê ve bibin.
Starmer, piştî civînekê ku nûnerên 49 welatan beşdar bûn tekez kir ku ev dê "bi tevahî aştiyane û parastinê" be û tenê piştî ku pevçûnên leşkerî li herêmê bi dawî bibin dê were bicîhanîn.
Ji êrîşên Amerîka û Îsraîlê yên dawiya Sibatê ve ku bûn sedema bilindbûna buhayên enerjî û sotemeniyê yên cîhanî, Îranê bi bandor rêya avê girtiye.
Duh, wezîrê derve yê Îranê got ku rê niha "bi tevahî vekirî ye" û Serokê Amerîkayê Donald Trump daxuyaniyên bi heman rengî dan.
Tehranê, got ku tengav dê heta nîvê hefteya bê, dema ku agirbesta demkî ya di navbera Dewletên Yekbûyî yên Amerîkayê û Îranê de bi dawî dibe, bi tevahî ji bo keştîyên bazirganiyê vebe.
Trump, rexne li NATO`yê kir ku "dema ku pêwîst be bêkêr e".
Trump, di dema şerê Îranê de gelek caran rexneyên tund li NATO`yê û bi taybetî jî li Brîtanyayê kirine.
Helwesta Keir Starmer ji destpêka şerê Amerîka-Îsraîlê yê bi Îranê re ew bû ku Brîtanya "nabe tevlî vê pevçûnê bibe" û wî berê gotibû ku welatê wî dê piştgirîya dorpêçê neke.
Di heman demê de, Serokwezîrê Brîtanî got ku bi dehan welatan "piştgiriya darayî" pêşkêşî mîsyona hevbeş a bi Fransayê re kirine.
Starmer got jî: "Em hemû welatên ku bi herikîna azad a bazirganiya cîhanî re eleqedar in, vedixwînin ku tevlî me bibin. Hin ji wan amadebûna xwe ji bo beşdarbûnê nîşan dane."
Wî piştrast kir ku hûrgiliyên din ên mîsyonê dê hefteya bê, piştî konferanseke plansaziya leşkerî li Londonê, werin ragihandin.
