Roja Zimanê Dayikê ya Cîhanî li çar aliyên Kurdistanê hat pîrozkirin û bangên xwedî derketina li zimanê Kurdî hat kirin.
Mesûd Barzanî: Parastina zimanê dayîkê erkeke niştimanî ye
Derbarê mijarê de Serokê Giştî yê PDK’ê Mesûd Barzanî peyamek belav kir.
Serokê PDK’ê Mesûd Barzanî di peyama xwe de bal kişand ser rola sereke ya ziman di jiyana gelan de û diyar kir ku zimanê dayîkê bingeha resenî, nasname, hişyarî û hevdengiya neteweyî ye.
Mesûd Barzanî girîngiya parastina ziman wekî "erkekî niştimanî" bi nav kir.
Serokê PDK’ê Mesûd Barzanî herî dawî Roja Zimanê Dayîkê li hemû Kurdistaniyan pîroz kir.
Nêçîrvan Barzanî: Parastina zimanê dayîkê parastina Kurdistanê ye
Her wiha Serokê Herêma Başûrê Kurdistanê Nêçîrvan Barzanî jî peyamek belav kir.
Nêçîrvan Barzanî diyar kir ku Başûrê Kurdistanê bi pirrengiya ziman û çandan tê naskirin û ji bo pêşvebirina zimanê dayikê, ji Kurdî bigire heya Tirkmenî, Suryanî û Ermenî, ew pabend e.
Nêçîrvan Barzanî got ku parastina zimanê dayikê parastina nasname û dîroka dewlemend a Kurdistanê ye.
Bafil Talebanî: Zimanê Kurdî sembola nasnameya me ya netewî ye
Li aliyekî din jî Serokê YNK’ê Bafil Celal Talebanî hemû xelkê Kurdistanê bi boneya Roja Zimanê Dayikê ya Cîhanê pîroz kir û got:
"Em bi zimanê xwe yê şîrîn ê Kurdî şanaz in û sembola neteweya me ye.
Parastina ziman a ku bav û kalên me ji me re hêlaye, erka me ye."
Bafil Talebanî teqez kir ku parastin û pêşxistina zimanê dayîkê, berpirsyariyeke hevbeş a her kes û pêkhateya civakê ye.
Mesrûr Barzanî: Ziman bingeha nasnameya me ye
Serokwezîrê Herêma Başûrê Kurdistanê Mesrûr Barzanî jî da zanîn ku Başûrê Kurdistanê bi hebûna ziman û çandên cuda dewlemend e.
Mesrûr Barzanî herî dawî got ku ziman, bingeheke girîng û sereke ya hebûn û nasnameya wan a neteweyî û niştimanî ye.
