Li Amedê îsal Cejna Newrozê bi dirûşmeya “Newroza Azadî û Yekîtiya Demokratîk” tê pîrozkirin.
Li gundê Keloşkê yê li quntara Çiyayê Qerejdaxê Amedê bi tevlîbûna parlamentera Amedê Adalet Kaya, hevserokên DEM Partiyê û DBPê yên Amedê, hevşaredarên Rezanê, çalakvanên TJAyê, gelek nûnerên saziyên sivîl û welatî şeva tarî bi agirê Newrozê ronî kirin.
Ciwanên ji du baskên gund meşale pêxistin li qada gund gihîştin hev.
Her wiha ciwanên meşale pêxistin posterê mezin ê Rêberê PKK Abdullah Ocalan vekirin û bi dirûşmeyên “Bê Serok jiyan nabe”, “Bijî Serok Apo” berz kirin.
Hevserokê DEM Partiyê Abbas Şahîn, endamê Desteya Hevserokatiyê ya PYDê Salih Muslim bi bîr anî û bal kişand ser aktorê sereke yê pêvajoyê Abdullah Ocalan.
Parlamenter Adalet Kaya da zanîn ku girîngiya pêvajoya niha û divê piştgiriya Pêvajoya Aştî û Demokrasiyê were kirin.
Piştî axaftinan, jin, ciwan û rêveberên partiyan li nava gund agirê Newrozê pêxistin.
Pîrozbahî heta derangiya şevê bi coşa govend û stranan berdewam kir.
Rêxistinên DEM Partî û DBP'ê yên Agiriyê bi boneya Newrozê li taxa 5 Evlerê ya navendê pîrozbahiyek li dar xist.
Di pîrozbahiyê de ciwan bi meşaleyan meşiyan û agir pêxistin.
Şêniyên tax jî beşdarî bernameyê bûn û demeke dirêj li derdora agir govend gerandin.
Her wiha ciwan û zarokên taxê xwe bi ser agir ve avêtin û çanda dîrokî zindî kirin.
