B.K. (15) ku li navçeya Cîzîr a Şirnexê ji ber lixwekirina kincek bi peyva "Kurdistan" hatibû binçavkirin, ji qereqola polîsan hate berdan.
B.K. ku li Kolana Orhan Dogan hatibû binçavkirin, li nexweşxaneyê bi zorê kincê wî derxistin û kincek din li wî kirin.
Polîsan kincê bi peyva "Kurdistan" desteser kir.
B.K. ku li dijî vê yekê nerazîbûn nîşan da, hate derbkirin û li erdê hate kaşkirin.
Tevî ku sorbûna li ser rûyê wî, birînên li ser çokên wî ji ber kaşkirina li erdê û şîdeta ku lê hatiye kirin vegot jî, bijîşk ev yek di rapora êrîşê de tomar nekir.
B.K. ji ber kelepçekirina li pişta xwe sorbûna lepên wî hebû û ew bê pêlav birin qereqola polîsan.
Piştî dermankirina nexweşxaneyê, B.K. birin qereqola polîsan a navçeyê.
B.K. bi hinceta lixwekirina forma ku li ser wî Kurdistan dinivîsand hat binçavkirin û bi sûcê "heqaretkirina polîsan" hat tawanbarkirin.
Dema ku hat bihîstin ku B.K. hatiye binçavkirin, parlamentera Partiya Wekhevî û Demokrasiyê ya Gelan (DEM Partî) ya Şirnexê Newroz Uysal Aslan, li gel nûnerên rêxistinên parêzgeh û navçeyê yên DEM Partiyê çûn qereqola polîsan.
Di destpêkê de polîsan îdia kirin ku B.K. nehatiye binçavkirin.
Piştî israrkirina heyetê, polîsan qebûl kirin ku zarok di bin çavdêriyê de ye, lê îdia kirin ku ew nizanin B.K. temenbiçûk e.
Piştî ku rapor hat pêşkêşkirin, B.K. bêyî ku îfadeyê wî were girtin, hat berdan.
Telefona wî ya ku ji hêla polîsan ve hatibû desteserkirin, jê re hat vegerandin.
Hat hînbûn ku îfadeya B.K. dê sibê ji hêla dozgerê zarokan ve were girtin.
Piştî serbestberdana wî, B.K. behsa lêdana ku lê hatiye kirin kir û diyar kir ku tomarên ku wî bi telefona xwe girtibûn ji aliyê polîsan ve bi zorê hatine jêbirin.
B.K. dê sibê bi parêzerên xwe re li dijî polîsên ku wî dane serlêdana giliyê bike.
