Ji 15'ê Gulanê “Roja Zimanê Kurdî” re çend roj mane.
Bi vê boneyê, zimanzan û lêkolîner Zana Farqînî der barê girîngî û xetereyên li ser zimanê Kurdî de axivî.
Zana Farqînî li ser siyaseta pişaftinê ya li ser Zimanê Kurdî ku ji aliyê dewleta Tirkiyê ve tê pêkanîn axivî, û ev tişt anî ziman:
“Eger ziman nebe zimanê hilberîna zihnî, di civakê de wê ‘zimanê me bê wate be’."
Zana Farqînî: Zimanê ku neyê veguhastin dimire
Zana Farqînî diyar kir ku, di nava kesên ku xwe “hişyar” dibînin de, qelsiyeke mezin a zimanî heye, û wiha axivî:
“Li Bakur xwendekar, rewşenbîr û hunermendên me, zêde qîmetê nadin zimanê xwe."
Zimanzan û lêkolîner Zana Farqînî da zanîn ku siberoja ziman zarok in, û li ser girîngiya zimanê dayikê wiha bang li malbatên Kurd kir:
“Divê malbat vê emanetê veguhêzin zarokên xwe.
Eger ziman derbasî zarokan nebe, ew ziman li ber mirinê ye."
Ebdulrehman Aslan: Divê em malên xwe bikin dibistanên Kurdî
Her wiha Mamosteyê Şaxa Komeleya Nûbiharê ya Êlihê Ebdulrehman Aslan jî dest nîşan kir ku, ziman gelekî girîng e û xwedîderketina li ziman xwedîderketina li erkeke pîroz e, û wiha domand:
“Ji bo ku pişaftin zêdetir nebe, divê em nava malê bikin dibistana Kurdî, zarokê ku pêşî zimanê dayikê fêr bibe, zûtir fêrî zimanên biyanî dibe "
