Serokwezîrê Iraqê Elî Falih Zeydî bi nûnerên Muqteda El Sedir re civiya.
Elî Falih Zeydî avakirina komîsyoneke çavdêrkirina entegrekirina koma Saraya Selam di nav hêzên ewlehiyê yên fermî yên Iraqê û radestkirina çekan ragihand.
Nivîsgeha Serokwezîr ev gav wekî "gaveke neteweyî" ber bi avakirin û xurtkirina desthilatdariya dewletê ve bi nav kir.
"Wê di demeke nêzîk de ji bo entegrekirina Pêşmergeyan xebat bên kirin"
Di demekê de ku bandorên biryara Koma Sedir berdewam dikin, îdiayek balkêş ji endamê Serokê Tevgera Niştimanî ya Eşîran Ebdurehman Cezayîrî derdikevin.
Ebdurehman Cezayîrî ku di heman demê de berpirsekî bilind ê Heşdî Şabiyê ye, ji Rûdawê re daxuyanî da.
El Cezaîrî îdia kir ku pêvajo ne tenê bi komên çekdar ên Şîe ve sînordare û dê di demek nêzîk de danûstandin ji bo entegrekirina hêzên Pêşmerge di nav artêşa navendî de dest pê bikin.
Her wiha ragihand ku plan belavkirina Pêşmergeyan li ser `Yekîneyên Dijî Terorê û Bersiva Awarte` yên girêdayî hikûmeta navendî ye.
Baxtiyar Mihamed: Pêşmerge hêzeke fermî ye
Heman çavkaniyê diyar kir ku Sekreterê Giştî yê Wezareta Pêşmergeyan a Hikûmeta Herêma Kurdistanê Bextiyar Mihemed jî ji wan re axiviye.
Baxtiyar Mihamed bal kişand ser rewşa yasayî ya Pêşmergeyan û wiha got:
"Heta niha derbarê vê yekê de tiştekî fermî negihiştiye me.
Eger ev yek were kirin jî divê destpêkê agahiya parlamento û hikûmetê jê hebe.
Ev mijar bi qanûnê tê kirin, ne bi rûniştin û dan û standin.
Hêza Pêşmergeyan hêzeke fermî û rewa ye. Ew ji aliyê Parlamentoya Îraqê ve hatiye naskirin."
