Serokê Amerîkayê Donald Trump li Ofîsa Oval pirsên rojnamevanan bersivandin.
Dema ku rojnamevanan ji Trump pirsîn, ka ew li ser kêmkirina hejmara hêzên Amerîkayê yên li Spanya û Îtalyayê jî difikire yan na?
Wî di bersivê de wiha got:
“Belê, dibe ku ez wî karî bikim.
Çima ez ê nekim? Îtalyayê alîkariya me nekir û Spanyayê jî gelekî xerab bû, bi temamî xerab bû.”
Trump roja çarşemê ragihandibû ku Washington "mijûlî lêkolîna li ser îhtîmala kêmkirina" hêzên Amerîkayê yên li Almanyayê ye û got ku ew ê di "demeke kurt de" li ser vê mijarê biryarê bide.
Heta 31´ê Kanûna Pêşîn a 2025´an, hejmara leşkerên çalak ên Amerîkayê li Îtalyayê 12 hezar û 662 û li Spanyayê 3 hezar û 814 bûye.
Her wiha li Almanyayê jî 36 hezar û 436 leşkerên wan hebûn.
Serokê Amerîkayê bi tundî rexne li welatên hevpeymanên NATO´yê kir, ji ber ku wan di êrîşên Amerîka û Îsraîlê yên li dijî Îranê de alîkarî nekiriye.
Her wiha Trump destnîşan kir ku wan ji bo vekirina Tengava Hurmizê ya ji bo çûn û hatina keştiyên petrolê jî alîkarî nekiriye.
Hefteya borî jî raporek hatibû belavkirin û tê de hatibû gotin ku Amerîka li ser rawestandina endamtiya Spanyayê ya di NATO'yê de difikire.
Sedema vê yekê jî redkirina piştgiriya operasyonên leşkerî yên li dijî Îranê ye.
