لە دوای پەرەسەندنی گرژییە سەربازییەکانی نێوان ویلایەتە یەکگرتووەکانی ئەمریکا و ئێران لە ناوچەکەدا، نرخەکانی نەوت لە بازاڕەکانی جیهاندا بە شێوەیەکی بەرچاو هەڵکشاون و نرخی نەوتی برێنت سنووری ۹۰ دۆلاری تێپەڕاند.
بەپێی زانیارییەکانی ماڵپەڕی ئاڕتی، گرێبەستەکانی نەوتی خاوی برێنت بە ڕێژەی ۲.۳٤٪ زیاد بوون و گەیشتنە ۹۰.۳٥ دۆلار بۆ هەر بەرمیلێک، لە کاتێکدا نەوتی خاوی ڕۆژئاوای تێکساسیش (WTI) بە ڕێژەی ۲.٦٤٪ بەرز بووەوە و گەیشتە ٨٥.٦٤ دۆلار بۆ هەر بەرمیلێک.
ئەم بەرزبوونەوە خێرایەی نرخەکان دوای ئەوە هات کە سوپای پاسدارانی ئێران بنکە سەربازییەکانی ئەمریکای لە هەریەکە لە پایەگاکانی "مەلیک حسێن" و "ئەزرەق" لە وڵاتی ئوردن بە مووشەکی بالیستی و درۆن کردە ئامانج، ئەوەش نیگەرانیی قووڵی لێکەوتووەتەوە سەبارەت بە سەقامگیریی ڕێڕەوەکانی وزە و نەوت لە ناوچەکەدا.