بەگوێرەی هەواڵێکی ئاژانسی "میزان"ـی سەر بە دەسەڵاتی دادوەریی ئێران، غوڵامحوسێن موحسینی ئێژەیی، سەرۆکی دەسەڵاتی دادوەری، لە نامەیەکدا بۆ ڕێبەری ئێران داوای کردبوو کە سزای ژمارەیەک زیندانی کەمکرێتەوە یان ئازاد بکرێن، و مووجتەبا خامنەیی داواکارییەکەی قبووڵ کردووە.
عەلی مووزەفەری، جێگری سەرۆکی دەسەڵاتی دادوەریی ئێران، لەم بارەیەوە ڕایگەیاند، ناوی ئەو ٢٥٧٧ زیندانییەی کە مەرجەکانی لێخۆشبوونیان تێدابووە، لەلایەن لیژنەیەکی تایبەتەوە پشکنینی وردیان بۆ کراوە و دۆسییەکانیان هەڵسەنگێندراوە.
دوای تەواوبوونی ڕێکارە یاساییەکان و پەسەندکردنی، بڕیارەکە بۆ جێبەجێکردن نێردراوەتە یەکە و ناوەندە پەیوەندیدارەکانی زیندانەکان.
لێخۆشبوون لە ئێراندا دیاردەیەکی ساڵانەیە و بەپێی دەستوور، لە بۆنە ئایینی و نەتەوەییە تایبەتەکاندا، ڕێبەری کۆماری ئیسلامی بە پێشنیازی سەرۆکی دەسەڵاتی دادوەری بڕیاری لێخۆشبوونی گشتی یان کەمکردنەوەی سزای زیندانیان دەردەکات. بڕیارەکەی ئەم جارەی مووجتەبا خامنەییش لەو چوارچێوەیەدا جێبەجێ کراوە.