ڕوانگەی "عێراقێکی سەوز" ئاشکرای کرد کە مانگی داهاتوو شاندێکی باڵای حکومەتی عێراق، کە نوێنەرانی چەندین وەزارەت و پسپۆڕانی تێدایە، سەردانی تورکیا دەکات بە مەبەستی تاوتوێکردنی پشکی ئاوی عێراق لە هەردوو ڕووباری دیجلە و فورات و پێداچوونەوە بە ڕێککەوتنی ساڵی ڕابردووی نێوان هەردوو وڵات.
بەگوێرەی ڕاگەیەنراوی ڕوانگەکە، شاندەکە پێکهاتووە لە نوێنەرانی وەزارەتەکانی سەرچاوەکانی ئاو، کشتوکاڵ، ژینگە و ژمارەیەک لە شارەزایانی بواری ئاو.
سەردانەکە لە کاتێکدایە کە لە مانگی تشرینی دووەمی ساڵی ٢٠٢٥دا، فوئاد حوسێن، وەزیری دەرەوەی عێراق و هاکان فیدان، وەزیری دەرەوەی تورکیا، ڕێککەوتنێکی هاریکاریی هاوبەشیان لە بواری ئاودا واژۆکردبوو، و ئێستا شاندەکە دەیەوێت قسە لەسەر جێبەجێکردنی ئەو ڕێککەوتنە بکات.
ڕوانگەکە هۆشداری دەدات کە عێراق بۆ بەرهەمە کشتوکاڵییەکانی بە ڕێژەی ٧٠٪ پشت بە ئاودێری دەبەستێت، و کەمبوونەوەی پشکی ئاو لەسەر هەردوو ڕووباری دیجلە و فورات، پێشتر کاریگەریی خراپی کردووەتە سەر چۆڵبوونی چەندین گوند و ناوچەی جیاوازی عێراق و ئاوارەبوونی دانیشتووانەکەیان.