ئەمڕۆ لە قەزای چەمچەماڵ، بە دەستپێشخەریی کۆمەڵەی ڕووناکبیری و کۆمەڵایەتیی یارسان و بە ئامادەبوونی کەسایەتییەکانی دەڤەری گەرمیان و ناوچە جیاوازەکانی کوردستان، لە ڕێوڕەسمێکی تایبەتدا خەڵاتی ڕێزلێنان پێشکەش بە ژمارەیەک هونەرمەندی نەتەوەیی کرا.
لە سەرەتای ڕێوڕەسمەکەدا، هەرێم کاکەیی، سەرۆکی کۆمەڵەی یارسان، جەختی لە یەکگرتوویی گەلی کورد کرد و ڕایگەیاند، کۆبوونەوەی هونەرمەندانی بەشە جیاوازەکانی کوردستان وەڵامێکە بۆ ئەو سنورە دەستکردانەی کە دوژمنان هیوایان لەسەر هەڵچنیوە.
لە ڕێوڕەسمەکەدا، هونەرمەند لوقمان سەلیم ئاماژەی بە ڕۆڵی شۆڕشی ڕۆژاڤا لە وەرچەرخانی مێژوویی و یەکخستنی ڕیزەکانی گەلی کورد کرد. هەروەها، باسی لە پێزانینی سەرکردایەتی ڕۆژاڤا کرد بۆ پشتیوانییەکانی باشوری کوردستان.
لای خۆشییەوە، جومعە کوێخا عەلی، سەرۆکی هۆزی لەک، هونەری وەک بەشێک لە خەبات و بەرخۆدان ناوبرد. هونەرمەند دەلیل میرسازیش سڵاوی هونەرمەندانی ڕۆژاڤای گەیاندە ئامادەبووان و ڕایگەیاند، ڕوحیەتی پشتیوانیی باشور کاریگەرییەکی گەورەی لە ڕۆژئاوای کوردستان دروستکردووە.
ڕێوڕەسمەکە، بە پێشکەشکردنی سرودی "ژن، ژیان، ئازادی"، لە لایەن هونەرمەند نەسرین بۆتان و پێشکەشکردنی خەڵاتی ڕێزلێنان بە هونەرمەندان کۆتایی هات.