شوێنەوارناسان لە دەڤەری شارباژێڕی پارێزگای سلێمانی، تەورێکی دەستیی بەردینیان دۆزیوەتەوە کە بە پێی هەڵسەنگاندنی پسپۆڕان، مێژووەکەی بۆ نێوان ٣٠٠ تا ٢٠٠ هەزار ساڵ پێش ئێستا دەگەڕێتەوە.
پ.د. دڵشاد زاموا، شوێنەوارناس و مامۆستای زانکۆی سلێمانی، ڕایگەیاندووە ئامرازەکە لە نزیک ڕووباری گوندی «واژە» لە سنووری قەزای چوارتا، بە ڕێکەوت لە کاتی گەشتێکی سروشتیدا دۆزراوەتەوە.
بەپێی ڕاوێژی پسپۆڕانی شوێنەواری و زەویناسی، ئامرازەکە سەر بە کۆتایی سەردەمی بەردینی کۆنی خواروو و سەرەتای سەردەمی بەردینی کۆنی ناوەڕاستە و لە جۆرە بەردێک دروستکراوە کە لە ناوچەکەدا بەردەستە.
شوێنەوارناسان دەڵێن ئەم جۆرە ئامرازانە لەو سەردەمەدا بۆ کارەکانی ژیانی ڕۆژانە، وەک بڕینی گۆشت و شکاندنی ئێسقان و بەکارهێنانی کەرەستە سروشتییەکان، بەکار هاتوون.
بەردە دۆزراوەکە لە مەراسیمێکدا ڕادەستی بەڕێوەبەرایەتیی شوێنەوار و کەلەپووری سلێمانی کراوە، بۆ ئەوەی بپارێزرێت و دواتر لە مۆزەخانەی شوێنەواری و شارستانیی زانکۆی سلێمانی نمایش بکرێت.
دۆزینەوەکە جارێکی تر گرنگیی ناوچەکانی کوردستان لە توێژینەوەکانی پەیوەندیدار بە مێژووی مرۆڤ و ژیانی مرۆڤی سەرەتایی دەخاتەڕوو