خوێندکارانی 12ـی ئاماده‌یی لە سلێمانی گردبوونەوە و داوای درێژكردنه‌وه‌ی ماوه‌ی خوێندن و دواخستنی کاتی تاقیکردنەوەکانیان كرد.
ئه‌مڕۆ سێشه‌ممه، 7ـی نیسانی 2026 بەشێک لە خوێندکارانی 12ـی ئاماده‌یی له لەبەردەم پەروەردەی ڕۆژئاوا له سلێمانی گردبوونه‌وه و داوایانكرد، تاقیكردنه‌وه‌كانیان بۆ دوابخرێت.
به گوته‌ی خوێندكاران، سیستمی ئه‌لیكترۆنیی له زیانی ئه‌وانه، چونكه وه‌ك خۆیان ده‌ڵێن، ئه‌و قۆناغیی ئه‌وانی تێدان، هه‌ستیار و چاره‌نوسسازه.
خوێندكاران داوایان كرد، ڕێگه‌یان پێبدرێت بگه‌ڕێنه‌وه ناو هۆڵه‌كانی خوێندن و له خوێندنگاكان به شێوه‌ی ئاماده‌بوون وانه‌كانیان بخوێنن.
خوێندکارانی 12ـی ئاماده‌یی داواشیان كرد، به‌هۆی ئه‌وه‌ی ماوه‌یه‌كی زۆریان له خوێندن فه‌وتاوه، قه‌ره‌بووی ئه‌و كاته‌یان بۆ بكرێته‌وه و ماوه‌ی خوێندنیان بۆ درێژ بكرێته‌وه.
به‌هۆی درێژبوونه‌وه‌ی جه‌نگی ئێران و زۆربوونی مه‌ترسیی و هێرشه‌كانی سه‌ر هه‌رێمی كوردستان، هه‌ردوو وه‌زاره‌تی په‌روه‌رده و خوێندنی باڵای هه‌رێمی كوردستان، بڕیاریاندا ده‌وام له سه‌رجه‌م ناوه‌نده‌كانی خوێندن بكرێته ئه‌لیكترۆنیی و ئۆنلاین.