ماڵپەری حوڕەی ئەمریکی بڵاویکردەوە، حکومەتی عێراق پلانێکی هەەیە بۆ ئەوەی لەدوای 30ی ئەیلولەوە سەردانی نافەرمی و چالاکیی ڕاوێژکارە سەربازیی و جەنەڕاڵە بیانییەکان، بە ڕاوێژکارە ئێرانی و ئەمریکییەکانیشەوە، سنووردار بکات.
بەگوێرەی زانیارییەکانی ماڵپەری حوڕە کە لە زاری بەرپرسێکی باڵای حکومەتی عێراقەوە وەرگیراون، سەرۆکوەزیرانی عێراق دەیەوێت سنوورێک بۆ چالاکیی ڕاوێژکارە سەربازییە بیانییەکان لەناو عێراقدا دابنێت و مەرجی ئەوە دادەنێت کە هەر بەرپرس یان ڕاوێژکارێکی سەربازی پێویستە لە ڕێگەی کەناڵە فەرمییەکانەوە مۆڵەت و فەرمانی هاتنە ژوورەوە بۆ وڵات وەربگرێت.
ئەم هەنگاوە لە کاتێکدایە کە 30ی ئەیلول وەک وادەی کۆتاییهاتنی ئەرکی هاوپەیمانان و دوایین مۆڵەت بۆ چەکدانانی گرووپەکان دیاریکراوە، و ئەو بەرپرسە عێراقییە جەختی لەوە کردەوە کە ئەو ڕێککەوتە بە "وادەی سەپاندنی سەروەری" هەژمار دەکرێت.