سەلجوق مزراکڵی، هاوسەرۆکی پێشووی شارەوانیی گەورەی ئامەد، ئەمڕۆ دوای نزیکەی حەوت ساڵ لە زیندانیکردن لە زیندانی ئێدیرنەوە ئازاد کرا و لەلایەن هاوسەرەکەی و جەماوەرێکی زۆرەوە پێشوازیی لێ کرا. لە کاتی ئازادبوونیدا لەبەردەم زیندان، پۆستەر و دروشم بۆ ئازادکردنی سەلاحەدین دەمیرتاش بەرز کرانەوە، و مزراکڵی پەیامەکەی دەمیرتاشی بەم شێوەیە گەیاند:
"بە هەموو شێوەیەک دیموکراسی، بە هەموو شێوەیەک ئاشتی و چارەسەر..."
بەگوێرەی زانیارییەکان، مزراکڵی دوای ئازادبوونی سەردانی گۆری سڕی سورەیا ئۆندەر ئەندامی شاندی ئیمڕاڵی و سیاستمەدار دەکات و دوابەدوای ئەم سەردانەش لە نەخۆشخانە چاوی بە ئیسماعیل بێشکچی نوسەر و کۆمەڵناس بکەوێت لە ئیستەنبوڵ.
بڕیارە دوای ئەنجامدانی دیدارەکان مزراكڵی بەرەو ئامەد بەڕێبکەوێت و چاوەڕواندەکرێت بەشێوەیەکی جەماوەری لە ئامەدی باکوری کوردستانەوە پێشوازی لێبکرێت.
سەلجوق مزراکڵی لە ساڵی 1963 لە شاری سیڤەرەکی باکوری کوردستان لەدایکبووە و لە ساڵی 2019ەشدا وەک هاوسەرۆکی شارەوانی ئامەد هەڵبژێردرا بەڵام دوای تێپەڕینی پێنج مانگ بەسەر هەڵبژرادنیدا قەیوم لە شوێنی دیاریکراو و ناوبراو هەر لەهەمان ساڵدا بەتۆمەتی ئەندامێتی ڕێکخراو دەستگیرکرا.