وەزارەتی تەندروستیی هەرێمی کوردستان ڕایگەیاند، بۆ یەکەمین جار لەمساڵدا دوو حاڵەتی تووشبوون بە نەخۆشیی تای خوێنبەربوون لە شاری هەولێر دەستنیشانکراون، کە هەردووکیان ئەندامی یەک خێزانن و بەهۆی سەربڕینی ئاژەڵ لەناو ماڵدا تووشی نەخۆشییەکە بوون.
بەگوێرەی ڕاگەیەندراوێکی وەزارەتی تەندروستی کە ئەمرۆ بڵاوکراوەتەوە، تووشبووەکان باوک و کوڕێکن کە تەمەنیان 71 ساڵ و 29 ساڵە و دانیشتووی گەڕەکێکی ناو شاری هەولێرن. تووشبوونیان دوای ئەوە دێت کە لە دوو هەفتەی ڕابردوودا لەناو ماڵەکەیاندا ئاژەڵیان سەربڕیوە و بەرکەوتنیان لەگەڵ ئاژەڵی تووشبوو و پێکهاتە و دەرهاویشتەکانی دوای سەربڕین هەبووە.
وەزارەتی تەندروستی ئاماژەی بەوە کردووە، دوای سەردانیکردنی نەخۆشخانە و گومانلێکردنیان بەهۆی دەرکەوتنی نیشانەکانی نەخۆشییەکەوە، چەندین ڕێکاری دەستنیشانکردن، پشتڕاستکردنەوە و چارەسەری پزیشکییان بۆ گیراوەتەبەر.
لە ئێستادا هەردوو نەخۆشەکە لەژێر چاودێریی پزیشکیدا لە نەخۆشخانە خەوێندراون و چارەسەر وەردەگرن؛ باری تەندروستیی یەکێکیان تا ڕادەیەک جێگیرە و ئەوی دیکەیان ناجێگیرە.
لە پەیامێکیشدا بۆ ڕای گشتی، وەزارەتی تەندروستی جەختی لەسەر جێبەجێکردنی ڕێنماییە تەندروستییەکان کردەوە و داوای لە هاونیشتمانیان کرد: "لەکاتی بوونی گومان و نیشانەکانی نەخۆشی لەسەر ئاژەڵ، پێویستە تیمەکانی ڤێترنەری ئاگاداربکەنەوە.
هەروەها ئەو هاونیشتمانیانەی بەرکەوتنیان لەگەڵ بەخێوکردنی ئاژەڵ یان بەرهەمە ئاژەڵییەکاندا هەیە، لەکاتی بوونی هەر نیشانەیەکی ناتەندروستدا بەخێرایی و بێ دواکەوتن سەردانی نەخۆشخانەکان بکەن."
سەبارەت بە ئاماری گشتیی نەخۆشییەکە، وەزارەتەکە ڕوونیکردەوە کە لە ماوەی ڕابردوودا چەندین حاڵەتی گومانلێکراوی تای خوێنبەربوون لە هەرێمی کوردستان سەردانی نەخۆشخانەکانیان کردووە، بەڵام دوای بەدواداچوون و پشکنین، تەنها ئەم دوو حاڵەتە بە فەرمی پشتڕاستکراونەتەوە. ئەمە جگە لە دوو حاڵەتی دیکەی دەرەوەی ئیدارەی هەرێمی کوردستان کە بۆ وەرگرتنی چارەسەر سەردانی نەخۆشخانەکانی هەرێمی کوردستانیان کردووە.