حکومەتی ئیسرائیل بە فەرمی دانی نا بە کۆمەڵکوژیی ئەرمەنییەکان کە لە سەردەمی جەنگی جیهانیی یەکەمدا لە لایەن دەوڵەتی عوسمانییەوە ئەنجامدرا؛ ئاژانسە نێودەوڵەتییەکانیش ئەم هەنگاوە وەک ئاماژەیەک بۆ گەیشتنی گرژییەکانی نێوان ئەنقەرە و تەلئەبیب بە لووتکە دەبینن.
وەزارەتی دەرەوەی ئیسرائیل بڕیارەکەی بە "مێژوویی" وەسف کردووە و ڕایگەیاندووە کە حکومەتی ئیسرائیل بە کۆی دەنگ لەگەڵ پێشنیارەکەی گیدۆر سان، وەزیری دەرەوەی وڵاتەکە هاوڕا بووە بۆ ناساندنی ئەو ڕووداوە وەک کۆمەڵکوژی.
بڕیارەکە دوای ئەم پەسندکردنەی حکومەت، ڕەوانەی پەرلەمانی ئیسرائیل (کنیست) دەکرێت تاوەکو دەنگی لەسەر بدرێت و بچێتە بواری جێبەجێکردنەوە.
ئاژانسی هەواڵی فرانس پرێس لە ڕاپۆرتێکدا ئاماژەی بەوە کردووە، تەلئەبیب ئەم بڕیارەی وەک کارتێکی فشار دژی حکومەتی تورکیا بەکارهێناوە، ئەمەش دوای ئەوەی لە ماوەی ڕابردوودا پێوەندییەکانی نێوان تورکیا و ئیسرائیل بەهۆی جەنگ و ئاڵۆزییەکانی ناوچەکەوە رووبەڕووی داڕمانێکی گەورە بوونەتەوە.