بەڕێوەبەرایەتیی گشتیی سەرچاوە سروشتییەکانی پارێزگای سنەی ڕۆژهەڵاتی کوردستان، ئامارێکی نوێی دڵخۆشکەری سەبارەت بە پاراستنی ژینگەی ناوچەکە بڵاوکردەوە و ڕایگەیاند، لە سەرەتای دەستپێکردنی وەرزی گەرماوە تاوەکو ئێستا، ڕێژەی ئاگرکەوتنەوە لە دارستان و لەوەڕگەکانی پارێزگاکە بەراورد بە ساڵی ڕابردوو بە ڕێژەی 93٪ کەمی کردووە.
بە گوێرەی زانیارییەکانی لایەنە پەیوەندیدارەکان، هۆکاری سەرەکیی ئەم کەمبوونەوە بەرچاوەی ئاگرکەوتنەوەکان بۆ دۆخی کەشوهەوای ئەمساڵ دەگەڕێتەوە. بارانبارینی زۆر و بەخوڕی ئەمساڵ بەراورد بە ساڵی ڕابردوو، کاریگەریی ئەرێنی و ڕاستەوخۆی هەبووە لەسەر پاراستنی شێداریی زەوییەکان.
هاوکات فێنکیی ڕێژەیی کەشوهەوا و کەمبوونەوەی تینی گەرما بەراورد بە هاوینی پار، وایکردووە زۆرێک لە لەوەڕگە و پوش و پاوانی کوێستانەکانی سنە هێشتا بە سەوزی بمێننەوە و وشک نەبن، ئەمەش ڕێگریی سروشتیی کردووە لە تەشەنەسەندنی ئاگر.
بەڕێوەبەرایەتیی قەیرانەکانی پارێزگای سنە هۆشدارییەکی توندی ئاراستەی سەرجەم هاووڵاتیان، ژینگەدۆستان و گرووپە خۆبەخشەکان کردەوە. تێیدا جەخت کراوەتەوە، کە پێویستە تەنیا ئەو کەسە پسپۆڕ و ڕاهێنراوانەی خاوەنی کەلوپەلی پێویستن بەشداری لە پڕۆسەی کوژاندنەوەی ئاگردا بکەن.
ئەم هۆشدارییە بە ئامانجی پاراستنی گیانی هاووڵاتیان و ڕێگریکردنە لە دووبارەبوونەوەی هەر کارەساتێکی دڵتەزێنی هاوشێوەی گیانلەدەستدانی سێ چالاکوانی ژینگەپارێزی لێهاتووی ناوچەکە، کە پێشتر لە کاتی کوژاندنەوەی ئاگری شاخی ئاویەری سنەدا گیانیان لە دەستدا.
ڕێژەی ئاگرکەوتنەوە لە دارستان و لەوەڕگەکانی پارێزگای سنە 93٪ کەمی کردووە
