وەزارەتی خوێندنی باڵا و توێژینەوەی زانستیی هەرێمی کوردستان لە گشتاندنێکدا سەرجەم زانکۆ و پەیمانگە تایبەتەکانی ئاگادار کردەوە کە نابێت پێش ڕاگەیاندنی فەرمیی ناوی وەرگیراوان، هیچ بڕە پارەیەک وەک قیستی کرێی خوێندن لە قوتابیان و خوێندکاران وەربگیرێت.
بەپێی گشتاندنەکە کە لە بەڕێوەبەرایەتیی خوێندنی تایبەت بە ژمارەی (١٦٥١٧) لە ڕێککەوتی (٢٧ـی ئەیلوولی ٢٠٢٦) دەرچووە، و پاڵپشت بە ڕێنماییەکانی وەرگرتن بۆ ساڵی خوێندنی (٢٠٢٦-٢٠٢٧)، وەزارەتەکە جەخت لەسەر پابەندبوونی تەواوی زانکۆ و پەیمانگە تایبەتەکان دەکاتەوە بە مەرج و پێوەرەکانی وەرگرتنەوە، و هۆشداری دەدات کە وەرگرتنی هەر قیست یان پارەیەک پێش دەرچوونی ناوی وەرگیراوان لەلایەن وەزارەتەوە پێچەوانەی ڕێنماییەکانە.