نووسینگەی سەرەکیی پڕۆژەی "هەژماری من" ڕایگەیاند، پرۆسەی تۆمارکردنی مووچەخۆران لە قۆناغی کۆتاییدایە و تەنیا کەمتر لە 2%ـی مووچەخۆران ماون خۆیان تۆمار بکەن، هاوکات لە مانگی ئابی 2026ـەوە دابەشکردنی مووچە بە شێوازی کاش بە تەواوی ڕادەوەستێت.
بەپێی ئەو داتایانەی دراونەتە کەناڵ8، ئامار و زانیارییە سەرەکییەکانی پڕۆژەکە بەم شوێنەی خوارەوەن:
دابەشکردنی کارت:
تەنیا لە هەفتەی ڕابردوودا ٢٠ هەزار کارتی بانکی ڕادەستی مووچەخۆران کراون، هەروەها ٥٥ هەزار کارتیش ئامادەکراون و لە بانکەکاندان و هێشتا لەلایەن خاوەنەکانیانەوە وەرنەگیراونەتەوە.
ژمارەی مووچەخۆران:
بۆ مووچەی مانگی ئاب، نزیکەی یەک ملیۆن مووچەخۆر لە ڕێگەی کارتی بانکییەوە مووچە وەردەگرن و ئەگەر ئەو ٥٥ هەزار کەسەش کارتەکانیان وەربگرنەوە، ژمارەکە یەک ملیۆن تێپەڕ دەکات.
ئامێرەکانی ڕاکێشانی پارە (ATM): تاوەکو ئێستا زیاتر لە ٧٥٠ ئامێری ڕاکێشانی پارە لەلایەن بانکە بەشداربووەکانەوە لە ناوچە جیاوازەکان دانراون و بڕیارە لە داهاتوودا ژمارەیان زیاتر بکرێت.
کۆتاییهاتن بە مووچەی کاش:
بەگوێرەی نووسراوی وەزارەتی دارایی، لە مانگی ئابەوە دابەشکردنی مووچە بە شێوازی کاش دەوەستێت و تەنیا لە ڕێگەی "هەژماری من"ـەوە دەبێت.
هەر مووچەخۆرێکیش فۆڕمەکە پڕ نەكاتەوە مووچەکەی نافەوتێت، بەڵکو دوای پڕکردنەوەی فۆڕم و وەرگرتنەوەی کارت لە بانکە گشتییەکاندا پارەکەی بۆ دەگەڕێندرێتەوە.
ئەم هەنگاوە لە چوارچێوەی ڕێککەوتنی نێوان وەزارەتی دارایی حکومەتی هەرێمی کوردستان و وەزارەتی دارایی فیدراڵدا دێت بۆ گواستنەوەی سەرجەم مووچەخۆران بۆ سەر سیستەمی بانکیی مۆدێرن.