نوێنەرایەتیی حکومەتی هەرێمی کوردستان لە بەغدا لە ڕێگەی نووسراوێکی ڕەسمییەوە لیژنەی نەوت و گازی لە ئەنجوومەنی نوێنەرانی عێراق ئاگادارکردەوە لە پێداویستییە بەپەلەکانی هەرێم بۆ بەرهەمە نەوتییەکان و چارەسەرکردنی قەیرانی سووتەمەنی.
لە نووسراوەکەدا، بەپشتبەستن بە ئامارەکانی وەزارەتی سامانە سروشتییەکان، جەخت کراوەتەوە کە بڕی 50 هەزار بەرمیل نەوتی ڕۆژانەی تەرخانکراو بەش ناکات و داوا کراوە بکرێتە 140 هەزار بەرمیل نەوتی خاو. پێداویستییە ڕاستەقینەکانی هەرێم بەم شێوەیە دیاریکراون: ڕۆژانە 7 ملیۆن لیتر بەنزین، 1.950.000 لیتر گازوایل و 3.250 تەن زەیتی سووتەمەنی بۆ وێستگەکانی کارەبا، 2 هەزار تەن گازی شل (LPG)، هەروەها ساڵانە 563.500.000 لیتر نەوتی سپی.
حکومەتی هەرێم داواشی لە بەغدا کردووە، هاوشێوەی پارێزگاکانی دیکەی عێراق تێچووی بەرهەمهێنان و گواستنەوەی نەوتەکە بگرێتە ئەستۆ، تاوەکو بتوانرێت بەنزین بە نرخی پشتیوانیکراوی 450 دینار بۆ هاووڵاتییان دابین بکرێت.
نوێنەرایەتی هەرێم لە بەغدا داوای زیادکردنی پشکی سووتەمەنی و گرتنەئەستۆی تێچووی بەرهەمهێنانی نەوت دەکات
