وەزارەتی دارایی و ئابووریی حکومەتی هەرێمی کوردستان لە ڕاگەیەندراوێکدا ئاشکرای کرد کە ڕۆژی یەکشەممە، 26ی تەممووزی 2026، دەست بە دابەشکردنی مووچەی مانگی حوزەیرانی مامۆستایانی گرێبەست لە هەردوو وەزارەتی پەروەردە و وەزارەتی خوێندنی باڵا و توێژینەوەی زانستی دەکرێت.
هاوکات لە هەمان ڕۆژدا مووچەی مانگی حوزەیرانی سەرجەم ئەو فەرمانبەرانەش دابەش دەکرێت، کە لە دوای 1ی تەممووزی 2024ـەوە بە شێوەی هەمیشەیی و گرێبەست لەسەر میلاکی دامەزراوەکانی حکومەتی هەرێم دامەزراون.
وەزارەتی دارایی ڕوونی کردووەتەوە، شایستە داراییەکانی ئەم توێژە لە مامۆستایان و فەرمانبەران بە تەواوی لەسەر داهاتی ناوخۆی هەرێمی کوردستان دابین دەکرێت.
بە گوێرەی ئامارە فەرمییەکان، لە هەرێمی کوردستاندا 86 هەزار و 791 فەرمانبەری گرێبەست هەن، کە نزیکەی 38 هەزاریان مامۆستان و مووچەکانیان لە سەرچاوەی داهاتی ناوخۆیی خەرج دەکرێت.
دارایی هەرێم دابەشکردنی مووچەی مامۆستایانی گرێبەست ڕاگەیاند
