دەزگای ئاسایشی هەرێمی کوردستان ڕایگەیاند کە لە دوو چالاکیی جیاوازدا لە سنووری سلێمانی و ئیدارەی ڕاپەڕین، بە هەماهەنگی لەگەڵ دەزگای دژەتێرۆری عێراق، دوو چەکداری داعشیان دەستگیرکردووە و ژن و منداڵێکیشیان لە دەستی یەکێک لە تیرۆریستەکان ڕزگارکردووە.
بەپێی ڕاگەیەندراوێکی دەزگای ئاسایشی هەرێمی کوردستان، ڕۆژی 14ی حوزەیرانی 2026، لەسەر بنەمای لێکۆڵینەوەی ورد و بەدواداچوونی پێشوەختە، بەڕێوەبەرایەتیی گشتیی ئۆپراسیۆنەکانی ئاسایش بە هاوکاریی دەزگای دژەتێرۆری عێراق توانیویانە دوو تیرۆریستی داواکراوی داعش لە سنووری پارێزگای سلێمانی و ئیدارەی سەربەخۆی ڕاپەڕین دەستگیربکەن.
لە ڕاگەیەندراوەکەدا ئاماژە بەوەش کراوە کە لە ئەنجامی چالاکییەکاندا، توانراوە ژن و منداڵی یەکێک لە تیرۆریستەکان ڕزگاربکرێن، کە پێشتر لەلایەن ئەو چەکدارەوە دەستبەسەرکرابوون و ڕاگیرابوون.
لە ئێستادا هەردوو دەستگیرکراوەکە بەپێی ماددەی دووی یاسای تیرۆر ڕاگیراون و لێکۆڵینەوەش لە دۆسیەکانیان بەردەوامە.