لە نوێترین چاوپێکەوتنیدا، ڕەجەب تەیب ئەردۆغان، سەرۆککۆماری تورکیا، جەخت لەسەر چاودێرکردنی وردی چالاکییەکانی پارتی ژیانی ئازادی کوردستان (پژاک) لە ئێران و هێزەکانی سوریای دیموکرات (هەسەدە) لە سوریا دەکاتەوە و ڕایدەگەیەنێت، نابێت لایەنەکان سوود لە ئاڵۆزییەکان وەربگرن.
ئەردۆغان لە چاوپێکەوتنێکیدا لەگەڵ گۆڤاری (نیوزویک)ـی ئەمریکی، سەبارەت بە پێکهاتەکانی ناوچەکە وتی، کورد، تورک و عەرەب وەک خوێن و ئێسقان وان و لە یەکتر جیا ناکرێنەوە، هەروەها ئاماژەی بە پێکەوەژیانی هەزار ساڵەی نێوانیان کرد و جەختی کردەوە کە ئارامی و خۆشگوزەرانیی برا کوردەکانیان جیاوازە لە پلان و هەڵسوکەوتی هێزە دەرەکییەکان.
سەرۆککۆماری تورکیا سەبارەت بە دۆخی ئێران هۆشداریی دا کە پێویستە کێشەکانی ئەو وڵاتە بەبێ دەستوەردانی دەرەکی چارەسەر بکرێن، و ڕایگەیاند کە لە نزیکەوە چاودێریی چالاکییەکانی پژاک دەکەن و نابێت سوود لە ئاڵۆزییەکانی ناوخۆی ئێران ببینرێت.
سەبارەت بە دۆخی سوریا و هەسەدەش، ئەردۆغان بە گۆڤارەکەی ڕاگەیاند، بە وردی چاودێریی پرۆسەی تێکەڵبوونی هەسەدە لەگەڵ حکومەتی سوریا دەکەن و جەختی لەوە کردەوە کە پێویستە تەواوی گرووپە چەکدارەکان لەژێر چەتری دەوڵەتی ناوەندیدا یەک بگرن، بە مەرجێک گەلی سوریا بە کوردیشەوە هەست بە ئارامی و مافی یەکسان بکەن.