قەبارەی پرۆژەیاسای بودجەی ساڵی 2027ی عێراق بە 217.239 تریلیۆن دینار دیاری کرا، کە تێیدا پشکی هەرێمی کوردستان بە 13.3 تریلیۆن دینار خەمڵێنراوە و بەپێی گۆڕانکارییەکانیش لە نرخی دینار و دۆلاردا داهاتی گشتی زیاد دەکات.
بە گوێرەی زانیارییەکان، خەرجیی گشتیی لە بودجەی 2027دا بە 217.239 تریلیۆن دینار دیاری کراوە، کە 47.897 تریلیۆن دیناری بۆ خەرجیی وەبەرهێنان و 169.342 تریلیۆن دیناری بۆ خەرجیی بەکارخستن تەرخان کراوە، لە چوارچێوەشیدا شایستەی فەرمانبەرانی میلاکی هەمیشەیی گەیشتووەتە 68.125 تریلیۆن دینار و چاودێریی کۆمەڵایەتیش 33.032 تریلیۆن دینارە، کە کۆی گشتیی مووچە و چاودێری 101.157 تریلیۆن دینار پێکه دەهێنێت.
لە ڕووی داهاتەوە، کۆی داهاتی گشتی 174.234 تریلیۆن دینار پێشبینی کراوە، کە 144.720 تریلیۆن دیناری داهاتی نەوتییە (بە هەژمارکردنی هەناردەی 4 ملیۆن بەرمیل ڕۆژانە بە نرخی 58 دۆلار و نرخی ئاڵوگۆڕی 1500 دینار، لەگەڵ بڕگەیەکی نوێ بۆ فرۆشتنی نەوت بە پاڵاوگەکان بە بڕی 17 تریلیۆن دینار) و 29.514 تریلیۆن دیناریشی داهاتی نانەوتییە و بەم پێیەش کورتهێنانی پێشبینیکراو گەیشتووەتە 43 تریلیۆن دینار و پشکی هەرێمی کوردستانیش بە 13 تریلیۆن و 308 ملیار دینار دیاری کراوە، ئەمەش لە کاتێکدایە کە لە بودجەی 2023دا پشکی هەرێم 16 تریلیۆن و 498 ملیار دینار بوو.
لە پرۆژەیاساکەدا نرخی 100 دۆلار لە 130 هەزار دینارەوە بەرز کراوەتەوە بۆ 150 هەزار دینار و بەگوێرەی ڕاپۆرتی سەرۆکی لیژنەی دارایی عێراق، ئەم دەستکارییەی نرخی دینار و دۆلار بڕی 19.204 تریلیۆن دینار داهات زیاد دەکات.
پرۆژەیاسای بودجەی 2027ی عێراق ئاشکرا کرا و پشکی هەرێم دیاری دەکرێت
