موقتەدا سەدر، سەرۆکی ڕەوتی نیشتمانیی شیعە، لە پەیامێکدا بۆ ئەمریکا ڕای گەیاند کە کاتی ئەوە هاتووە پەڕەی ڕابردوو بە دادپەروەری داخرێت و داوا دەکات واشنتن لەسەر بنەمای ڕێزگرتن لە سەروەریی عێراق مامەڵە بکات و وڵاتەکەیان نەبێتە گۆڕەپانی یەکلاکردنەوەی ململانێکان.
موقتەدا سەدر لە پەیامەکەیدا ئاماژەی بەوەدا، ئەوان لە ڕابردوودا دژی داگیرکاری بەرگرییان کردووە و دژایەتیی کەس ناکەن، بەڵام سەربەخۆییی وڵات لە سەرووی هەموو شتێکەوەیە و گوتی: "ئەگەر دەتانەوێت پەڕەی کۆن دابخەن، پێویستە بە شێوەیەکی دادپەروەرانە و بەبێ لووتبەرزی دایبخەن."
سەدر جەختی لەوەش کردەوە، دەیانەوێت عێراق بە ئازادی و سەربەخۆیی و دوور لە هەژموونی دەرەکی (چ ڕۆژهەڵاتی بێت یان ڕۆژئاوایی) بنیات بنێنەوە و ڕەتی کردەوە وڵاتەکەیان ببێتە گۆڕەپانی یەکلاکردنەوەی ململانێ سیاسی و ئابوورییەکان و نابێت پابەند بن بە شەڕکردن لەبری هیچ لایەنێک.
پەیامەکەی سەدر لە کاتێکدایە، لە 30ی ئەیلوولی ئەم ساڵەوە پرۆسەی کشانەوەی تەواوی هێزەکانی سوپای ئەمریکا و هاوپەیمانان لە سەرجەم بنکە سەربازییەکانی عێراق کۆتایی هات و ناوبراو لە کۆتایی پەیامەکەیدا جەختی لەوە کردەوە: "پێویستە ئەمریکا مامەڵەیەکی دیپلۆماسیی دادوەرانە لەگەڵ عێراق بکات، نە ئاڵاکەتان بخرێتە ژێر پێ و نە شکۆ و سەربەخۆیی ئێمەش ژێرپێ بخەن."
موقتەدا سەدر بۆ ئەمریکا: کاتی ئەوە هاتووە پەڕەی ڕابردوو بە دادپەروەری دابخرێت
