بەڕێوەبەرایەتیی پۆلیسی پارێزگای هەولێر لە ڕاگەیەندراوێکدا دەستگیرکردنی دوو شۆفێری بە تۆمەتی ئەنجامدانی سەرکێشی و دروستکردنی ئاڵۆزی و رووداوی هاتووچۆ لە شاری هەولێر ڕاگەیاند.
دوای بڵاوبوونەوەی گرتەیەکی ڤیدیۆیی لە تۆڕە کۆمەڵایەتییەکان کە تێیدا دوو ئۆتۆمبێلی جۆری تۆیۆتا کۆرۆلای تایبەت و تۆیۆتا کۆرۆلای تەکسی هەڵسوکەوتی نەگونجاو و سەرکێشییان لەسەر شەقام دەکرد، هێزەکانی بەشی پۆلیسی ناوشار (ڕۆژئاوا - بنکەی پۆلیسی کوردستان) بەدواداچوونی وردیان ئەنجام دا.
لە ئەنجامی بەدواداچوونەکاندا، لە ماوەیەکی کەمدا هەردوو شۆفێرەکە دەستگیر کران و دەست بەسەر ئۆتۆمبێلەکانیانیدا گیرا. پۆلیسی هەولێر جەختی کردەوە کە تۆمەتباران بە نووسراوی فەرمی و بە مەبەستی وەرگرتنی ڕێکاری یاسایی ڕادەستی بەڕێوەبەرایەتیی هاتووچۆی هەولێر دەکرێن.