پەرلەمانی تورکیا بە مەبەستی بەدەمەوەهاتنی زیاتر و سەرخستنی پرۆسەی ئاشتی، ئامادەکاری دەکات بۆ هەموارکردنەوەی هەریەکە لە یاساکانی بەرەنگاربوونەوەی "تیرۆر"، یاسای سزاکان و یاسای جێبەجێکردنی سزاکان.
سەرچاوەیەک لە پارتی داد و گەشەپێدان (ئاکپارتی)ی دەسەڵاتدار بە ڕۆژنامەی "تورکیا"ی ڕاگەیاندووە، هه‌‌نگاوه نوێیه‌کانی پەرلەمان هاوتەریب دەبێت لەگەڵ چاودێریی مەیدانیی هێزە ئەمنی و هەواڵگرییەکانی تورکیا بۆ دڵنیابوونەوە لەوەی پەکەکە چەکی داناوە.
جێی باسە، ساڵی ڕابردوو پەرلەمانی تورکیا کۆمیسیۆنێکی ٥١ کەسی بۆ پرۆسەی ئاشتی پێکهێنا و دوای نووسینەوە و پەسەندکردنی پرۆژەیاسای پرۆسەی ئاشتی لە مانگی ئابدا، کۆتایی بە ئەرکەکانی هات.
دوای پەسەندکردنی یاساکە بە دەنگی زیاتر لە دوو لەسەر سێی پەرلەمانتاران، دەستەی چاودێریکردن و هەڵسەنگاندنی پرۆسەکە بە سەرۆکایەتیی جەودەت یڵماز، جێگری سەرۆککۆماری تورکیا و بە بەشداریی وەزیرانی دەرەوە، داد، ناوخۆ، بەرگری، سەرۆکی هەواڵگری و سکرتێری گشتیی ئەنجوومەنی ئاسایش پێکهێنرا و بڕیاریشە بۆ هەمان مەبەست کۆمیسیۆنێک لە ١٧ پەرلەمانتاری پارتە جیاوازەکان پێکبهێنرێت.
پەرلەمانی تورکیا بۆ سەرخستنی پرۆسەی ئاشتی سێ یاسای گرنگ هەموار دەکاتەوە
