لیستی مووچەی مانگی ئەیلولی فەرمانبەرانی هەرێمی کوردستان سبەی ڕەوانەی بەغدا دەکرێت
وەزارەتی دارایی و ئابووریی هەرێمی کوردستان ڕای گەیاند، ئامادەکارییەکانی لیستی مووچەی مانگی ئەیلول سبەی کۆتاییان دێت و لەلایەن شاندێکی تەکنیکییەوە بەرەو بەغدا بەڕێ دەکرێت، بۆ ئەوەی لە ڕۆژی دووشەممە بە فەرمی ڕادەستی وەزارەتی دارایی فیدراڵ بکرێت.
سەرچاوەیەک لە وەزارەتی دارایی و ئابووریی هەرێمی کوردستان ڕایگەیاند، سبەی ئێوارە لیستی مووچەی مانگی ئەیلول و تەرازووی پێداچوونەوەی مانگی ئاب دەگەنە بەغدا و بەیانیی ڕۆژی دووشەممە بە فەرمی ڕادەستی وەزارەتی دارایی عێراق دەکرێن.
سەبارەت بە هۆکاری دواکەوتنی ناردنی لیستەکەش، سەرچاوەکەی وەزارەتی دارایی ئاماژەی بەوە کرد، ئەم مانگە بەهۆی پشووەکان، هەندێک ڕێکاری یەکخستنەوەی بانکەکان و چەند کارێکی تەکنیکییەوە ناردنی لیستی مووچە کەمێک دوا کەوتووە.
ئەمە لە کاتێکدایە، پێشتر بۆ مانگی ئاب، لیستەکە لە ٢٣ی ئاب ڕەوانە کرابوو و لە ١٥ تا ١٩ی ئەیلوول پرۆسەی دابەشکردنی مووچەی سەرجەم وەزارەت و دامەزراوەکانی هەرێمی کوردستان کۆتایی پێ هاتبوو.