مەزڵوم عەبدی، ڕاوێژکاری سەرۆکایەتیی کۆماری سوریا، بە ئامادەبوونی مەحموود بەرخودان، فەرماندەی لیوای کۆبانی، لەگەڵ سەرکردەی پارتە کوردییەکان لە شاری کۆبانی کۆبووەوە بە مەبەستی تاوتوێکردنی پێشهاتەکانی یەکگرتنی کارگێڕی و ئەمنی و پرسی خوێندن بە زمانی دایک.
لە کۆبوونەوەکەدا مەزڵوم عەبدی جەختی لەسەر بەردەوامیی هەماهەنگییەکان لەگەڵ وەزارەتە پەیوەندیدارەکان کردەوە بۆ گرەنتی کردنی مافی خوێندن بە زمانی کوردی لە چوارچێوەیەکی دەستووری و یاساییدا. سەبارەت بە نائارامی و ڕووداوەکانی ئەم دواییەی کۆبانیش، مەزڵوم عەبدی ڕایگەیاند، لێکۆڵینەوە لە پێشێلکارییەکان دەکرێت و بەرپرسانی ڕووداوەکان لێپرسینەوەیان لەگەڵدا دەکرێت تاوەکو ئاسایش و سەقامگیری بۆ ناوچەکە بگەڕێتەوە.
لە بەشێکی دیکەی دیدارەکەدا تیشک خرایە سەر ڕۆڵی گرنگی پارتە کوردییەکان لە بەرزڕاگرتنی مافە ڕۆشنبیری و زمانەوانییەکان و جێگیرکردنیان لە دەستووردا. هاوکات مەزڵوم عەبدی ئاماژەی بەوە کرد، لەگەڵ لایەنە پەیوەندیدارەکان کار دەکەن بۆ ڕێکخستن و بەفەرمیکردنی باری یاسایی دامەزراوە و چالاکییە کوردییەکان لە ناو سیستمی فەرمیی دەوڵەتی سوریادا.
مەزڵوم عەبدی لە کۆبانێ لەگەڵ سەرکردەی پارتە کوردییەکان کۆبووەوە
