لەتیف نێروەیی، ئەندامی سەرکردایەتیی یەکێتیی نیشتمانیی کوردستان، ڕایگەیاند کە تائێستا دۆخی ئەمنی و خزمەتگوزاریی شنگال گونجاو نییە بۆ گەڕانەوەی ئاوارەکان.
ئاماژەی بەوە دا کە زیاتر لە ١١٠ هەزار ئێزدی هێشتا لە شار و شارۆچکەکانی هەرێمی کوردستاندا ئاوارەن.
لە لێدوانێکدا بۆ کەناڵی (نووچە تیڤی)، ناوبراو داوای لە حکومەتی فیدراڵ و حکومەتی هەرێمی کوردستان کرد کە دەستی ئاوەدانی و خزمەتگوزاری بگەیەننە شنگال.
ڕەخنەشی لەوە گرت کە هێزە کوردستانییەکان هێشتا پڕۆژەیەکی هاوبەش و یەکگرتوویان بۆ چارەسەرکردنی ڕیشەییی کێشەکانی شنگال نییە، لە کاتێکدا چارەنووسی دەیان ژن و کچی ئێزدیی ڕفێنراویش هێشتا بە نادیاری ماوەتەوە.