ئەمڕۆ دووشەممە، ٣ی ئابی ٢٠٢٦، عەلی باپیر، سەرۆکی کۆمەڵی دادگەریی کوردستان، بە یاوەریی شاندێکی مەکتەبی سیاسیی حیزبەکەی، لە پیرمام سەردانی مەسعود بارزانی کرد و لەلایەن هۆشیار زێباری و مەحموود محەممەد، ئەندامانی مەکتەبی سیاسیی پارتی دیموکراتی کوردستانەوە پێشوازیی لێ کرا.
لەم دیدارەدا کە عەبدولستار مەجید، یاسین حەسەن، ئەنوەر سەنگاوی و فەخرەدین قادر تێیدا ئامادە بوون، هەردوولا چەندین پرسی هەستیاری پەیوەست بە دۆخی ژیان و بژێویی خەڵکیان تاوتوێ کرد.
بەگوێرەیراگەیەندراوی عەلی باپیر، قەیرانەکانی مووچە، بەرزیی نرخی سووتەمەنی، قەیرانی ئابووری و دۆخی بازاڕ وەک تەوەرێکی سەرەکیی کۆبوونەوەکە خرانە ڕوو و جەخت لەسەر دۆزینەوەی ڕێگای چارەسەری گونجاو بۆ کێشەکانی هاووڵاتییان کرایەوە.
هاوکات لایەنەکان پاراستنی قەوارەی هەرێمی کوردستان و دوورخستنەوەی لە ئاڵۆزییە ناوچەیییەکانیان وەک بەرپرسیارییەتییەکی گشتی و کاری لەپێشینە باسی لێوە کرد و، بۆ ئەم مەبەستەش جەخت لەسەر گرنگیی تەبایی، سازانی نێوان لایەنە سیاسییەکانی هەرێم و پێویستیی ئەنجامدانی کۆبوونەوەیەکی هەمەلایەنە و لوتکەی حیزبەکان کرا.
لە کۆتاییشدا هەردوولا خواستی خۆیان بۆ گەشەپێدانی زیاتری پەیوەندییەکانی نێوان کۆمەڵی دادگەری و پارتی دیموکراتی کوردستان دووبارە کردەوە.