سکرتاریەتی کۆمیتەی ناوەندیی کۆمەڵەی شۆڕشگێڕی زەحمەتکێشانی کوردستانی ئێران لە ڕاگەیەندراوێکی بەپەلەدا، بە توندی ئەو دەنگۆ و هەواڵانەی ڕەتکردەوە کە لە بەشێک لە تۆڕە کۆمەڵایەتییەکان و هەندێک کەناڵی تەلەڤزیۆنیدا دەربارەی شێوازی گیانبەختکردنی 9 پێشمەرگەکەیان بڵاوکراونەتەوە و ڕایگەیاند کە ئەو دەنگۆیانە بێ بنەمام و سەرلەبەریان ناڕاستن.
کۆمەڵە ئاماژەی بەوە کردووە کە هەندێک دەزگای ڕاگەیاندن هەواڵی هەڵبەستەیان لەسەر شێوازی ڕووداوەکە پەرەپێداوە، بۆیە بە توندی داوا لە سەرجەم میدیاکاران، ڕۆژنامەنووسان و دەزگاکانی ڕاگەیاندن دەکەن کە بۆ دەستکەوتنی هەر زانیارییەک لەسەر بابەتەکانی پەیوەندیدار بە کۆمەڵەوە، ڕاستەوخۆ پشت بە بەلاغ و سەرچاوە فەرمییەکانی ئەوان ببەستن و خۆ لە بڵاوکردنەوەی هەواڵی بێ بنەما بپارێزن؛
جەختیشیان کردەوە کە "هیچ سەنگەرێکی ئازادیخوازانە بە درۆ و هەواڵی هەڵبەستە بەتاڵ نابێت."
ئەم ڕوونکرنەوەیە لە کاتێکدایە کە هەر ئەمڕۆ کۆمەڵە لە پەیامێکی گشتگیر و بەرفراواندا، سپاس و پێزانینی خۆی ئاراستەی سەرجەم جەماوەری خەڵکی کوردستانی ڕۆژهەڵات و باشوور، لایەنە سیاسییەکانی هەر چوار پارچەی کوردستان، هێزە ئۆپۆزسیۆنەکانی ئێران و کەسایەتییە مەدەنییەکان کرد دوابەدوای ئەو شەپۆلە گەورەیەی هاوخەمی و پاڵپشتییەی کە لێیان کرابوو.
ڕووداوەکە بۆ سەرلەبەیانیی ڕۆژی هەینی، 26ی پووشپەڕی 1405ی هەتاوی (17ی تەممووزی 2026) دەگەڕێتەوە، کاتێک لە هێرشێکی هاژەکی و درۆنیدا لەلایەن سوپای پاسدارانی کۆماری ئیسلامیی ئێرانەوە هێرش کرایە سەر بنکە و بارەگاکانی کۆمەڵە لە خاکی هەرێمی کوردستان و لە ئەنجامدا 9 پێشمەرگە و خوازیاری پێشمەرگایەتی گیانیان بەختکرد.
کۆمەڵە لە بەشێکی دیکەی پەیامەکەیدا سەرنجی بۆ ئاڵۆزییە هەرێمییەکان ڕاکێشاوە و ڕایگەیاندووە کە کۆماری ئیسلامیی ئێران بەرپرسیاری یەکەمی تێکدانی سەروەریی خاکی هەرێمی کوردستان و دروستکردنی جەنگ و کاولکارییە لە ناوچەکەدا.
جەختیشیان لەوە کردەوە کە تەنیا ڕێگەی دەربازبوون لەم قەیران و ماڵوێرانییە ڕوخانی تەواوەتی ئەو ڕژێمەیە، هاوکات هۆشدارییان دایە هێزە ئەمنییەکان و هەڵخڵەتاوانی سەر بە حکومەت کە تا کاتیان ماوە ڕێگەی خۆیان لە دەسەڵات جیا ببنەوە.