بڕیارێکی نوێ لەبارەی مۆڵەتی بێمووچەی فەرمانبەران و نرخی بەنزین دەرچوو

ئەنجوومەنی وەزیرانی هەرێمی کوردستان بە سەرۆکایەتیی مەسرور بارزانی کۆبووەوە؛ لە کۆبوونەوەکەدا جیا لە بەکۆیلەکردنی هێرشەکانی سەر هەرێم، بڕیار لەسەر داشکاندنی 50٪ و 25٪ی قەرزی کارەبا و درێژکردنەوەی لێخۆشبوونی 20٪ی سزاکانی هاتوچۆ درا.

ئەمڕۆ چوارشەممە، 22ـی تەممووزی 2026، ئەنجوومەنی وەزیرانی هەرێمی کوردستان کۆبوونەوەی ئاسایی خۆی ئەنجامدا. لە دەستپێکی کۆبوونەوەکەدا، ئەنجوومەنی وەزیران بە توندترین شێوە هێرشەکانی سەر هەرێمی کوردستانی شەرمەزار کرد و جەختی کردەوە کە هەرێمی کوردستان بەشێک نەبووە لە شەڕ و گرژییەکان و هەمیشە فاکتەری ئارامی بووە، بۆیە داوای کۆتاییهێنانی بەو هێرشانە کرد.

 بڕیارەکانی بواری هاتوچۆ:

ئەنجوومەنی وەزیران پێشنیاری وەزارەتی ناوخۆی پەسەند کرد بۆ درێژکردنەوەی بڕیاری لێخۆشبوونی 20٪ لە سزاکانی هاتوچۆ. بڕیارەکە لە 1ی تەممووزی 2026 تاوەکو 31ی کانوونی یەکەمی 2026 جێبەجێ دەکرێت، بەمەبەستی ڕەخساندنی دەرفەت و ئاسانکاری بۆ پاکتاوکردنی پابەندبوونی دارایی هاووڵاتییان.

 بڕیارەکانی کەرتی کارەبا و پڕۆژەی ڕووناکی:

سەبارەت بە قەرزی کەڵەکەبووی پارەی کارەبا، ئەنجوومەنی وەزیران چەند ئاسانکارییەکی پەسەند کرد:

داشکاندنی 50٪ بۆ قەرزی کەڵەکەبووی هاوبەشانی ماڵان و کشتوکاڵی.

داشکاندنی 25٪ بۆ قەرزی هاوبەشانی کەرتی پیشەسازی، بازرگانی و گشتی.

ئەنجوومەنی وەزیران ڕوونی کردەوە کە ئەم داشکاندنە تەنیا قەرزە کۆنەکانی پێش دەستپێکردنی پڕۆژەی ڕووناکی دەگرێتەوە، نەک پارەی مانگانەی پڕۆژەی ڕووناکی (کارەبای 24 کاتژمێری). بڕیاریشە لە ماوەیەکی نزیکدا ڕێنمایی و میکانیزمی جێبەجێکردنی ئەم بڕیارە بڵاوبکرێتەوە.

 سووتەمەنی و نرخی بەنزین:

وەزیری سامانە سروشتییەکان بە وەکالەت ڕاپۆرتێکی لەسەر دۆخی سووتەمەنی خستەڕوو. ئەنجوومەنی وەزیران وەزارەتەکەی ڕاسپارد ڕێکاری پێویست بگرنەبەر بۆ هێنانەکاتی بڕی زیاتری سووتەمەنی و ڕێگری لە بەرزبوونەوەی نرخی بەنزین، هەروەها لایەنە پەیوەندیدارەکانی ڕاسپارد چاودێریی وردی بەنزینخانەکان بکەن بۆ پاراستنی کوالیتی و پابەندبوون بە نرخەکان.

 مۆڵەتی بێمووچەی فەرمانبەران:

لە دوا بڕگەی کۆبوونەوەکەدا، ئەنجوومەنی وەزیران ڕاسپاردەکانی دیوانی ئەنجوومەنی وەزیرانی بۆ ڕێکخستنەوەی مۆڵەتی بێمووچەی فەرمانبەران پەسەند کرد، بە ئامانجی یەکخستنی ڕێکارەکان لەگەڵ یاسای نوێی خانەنشینیی یەکگرتوو؛ بۆ ئەم مەبەستەش وەزارەتی دارایی و ئەنجوومەنی گشتیی ڕاژە ڕاسپێردران ڕێنمایی نوێ دەربکەن.