بەرێوەبەرایەتیی فڕۆکەخانەی نێودەوڵەتیی نەجەف ڕایگەیاند، سبەی یەکشەممە، دوای چەند ڕۆژێک لە ڕاگرتنیان، گەشتە ئاسمانییەکانی کۆمپانیا ئێرانییەکان بۆ فڕۆکەخانەکە دەست پێ دەکەنەوە و لە قۆناخی یەکەمدا سێ گەشتی ئێواران ئەنجام دەدرێن.
ئەمڕۆ شەممە، ئیدارەی فڕۆکەخانەی نێودەوڵەتیی نەجەف لە ڕاگەیێندراوێکدا ئاشکرای کرد، دوای ڕێککەوتنی عێراق و واشنتن لەسەر پێدانی هەڵاوێرد بۆ سزاکانی ئەمریکا، بڕیاری دەستپێکردنەوەی گەشتەکان گەیشتووەتە دەستیان و لە ڕۆژانی داهاتوودا بە شێوەیەکی پلەبەندی ژمارەی گەشتەکان زیاد دەکەن.
مستەفا کوبە، بەڕێوەبەری ڕاگەیاندنی فڕۆکەخانەی نەجەف ڕایگەیاند، بڕیارەکە لە ئێستادا کۆمپانیا ئێرانییەکان دەگرێتەوە و سەبارەت بە کۆمپانیا عێراقییەکانیش، بابەتەکە پەیوەستە بە لایەنی عێراقییەوە بۆ دیاریکردنی وادەی دەستپێکردنەوەی گەشتەکانیان.
فڕۆکەخانەی نەجەف: سبەی یەکشەممە گەشتە ئاسمانییەکان لەگەڵ ئێران دەست پێ دەکەنەوە
