هاوسەرۆکی کۆما جڤاکێن کوردستان (کەجەکە)، جەمیل بایک، لە دیمانەیەکی تایبەتدا لەگەڵ کەناڵی (نووچە تی ڤی)، ڕەخنە لە ناوەڕۆکی "قانوونی چوارچێوە" دەگرێت و دەڵێت، حکومەتی تورکیا قانوونەکەی بەگوێرەی خواستەکانی خۆی ئامادە کردووە، جەختیش دەکاتەوە کە تاوەکو ڕێبەر ئاپۆ بە فیزیکی ئازاد نەبێت و دەستکاریی زوگۆنەکان نەکرێت، ئەوان چەک دانانێن.
لە دیمانەکەدا، جەمیل بایک تیشکی خستە سەر پرۆسەی ئاشتی و کۆمەڵگەی دیموکراتیک و ڕایگەیاند، ئەو قانوونەی لە مەجلیسی تورکیا دەرچووە نە لە بەرژەوەندیی ئەوانە و نە داخوازییەکانی ئەوان تێدا ڕەچاو کراوە، بەڵکو ئامانجی سەرەکی لێی بێچەککردن و بڵاوەپێکردنی گەریلا بووە. هەروەها ئاماژەی بەوە دا کە "لە نێوان ئێمە و دەوڵەتی تورکیادا لەسەر ئەم قانوونە تێکۆشان هەیە" و شرتی سەرەکی بۆ سەرخستنی پرۆسەکە ئەوەیە کە مەرج و سەلامەتی بۆ عەبدوڵا ئۆجالان بڕەخسێت تاوەکو بتوانێت پرۆسەکە بەڕێوە ببات.
پەیوەندی لەگەڵ ئیمراڵی و هەڵوێست لەسەر پەکەکە
لەبارەی شێوازی پەیوەندیکردن لەگەڵ عەبدوڵا ئۆجالان، بایک ڕونی کردەوە کە ئەوان پەیوەندیی ڕاستەخۆیان نییە، بەڵکو لە رێگەی هەیەتی دەم پارتییەوە پەیام و راوڕێچکەکان دەگۆڕنەوە، و جەختی کردەوە کە "رێبەر ئاپۆ بێی ئێمە هیچ پêngاوێک نانێت و دیدی ئێمە وەردەگرێت." هەروەها سەبارەت بە پرسی هەڵوەشاندنەوەی فەرمیی پەکەکە گوتی، پەکەکە ڕووحێکە لەناو کۆمەڵگەی کوردیدا دروست بووە و ئێستا بە شێوازێکی سیاسی کار دەکات، بەڵام بڕیاری چەکدانان و گەڕانەوە بۆ تورکیا بەستراوەتەوە بە ئازادبوونی جەستەیی ڕێبەر ئاپۆ و دەستکەوتنی مافی کاری سیاسییەوە.
بانگەواز بۆ یەکێتیی نەتەوەیی و پاراستنی قەندیل
لە تەوەرێکی تری قسەکانیدا، هاوسەرۆکی کەجەکە جەختی لە گرنگیی یەکێتیی نەتەوەیی کردەوە و رایگەیاند کە ئەوان بێ هیچ مەرجێک ئامادەن لەگەڵ سەرجەم لایەنە کوردییەکان لەسەر یەک مێز دابنیشن. هەروەها لەبارەی دۆخی ناوچەکە و پاراستنی قەندیل وەک "کەڵەی کورد" جەختی کردەوە کە پاراستنی ئەرکی هەموو کوردێکە.
لە کۆتایی قسەکانیدا، جەمیل بایک هۆشداری دا کە ئەگەر پرۆسەی ئاشتی سەرکەوتوو نەبێت و تورکیا ڕژد نەبێت لەسەر چارەسەرکردنی دیموکراتیکی پرسی کورد، ئەوا ئەوان بۆ "شەڕێکی مەزن" ئامادەن، بەڵام پێشەنگی بە ڕێگەی سیاسی و دیپلۆماسی دەدەن ئەگەر مەرج و گەرەنتییە پێویستەکان دابین بکرێن.