لە چەندین شاری باکووری کوردستان و تورکیا، لەلایەن پلاتفۆرم و ڕێکخراوە دیموکراتییەکانەوە ناڕەزایەتی بەرامبەر ڕفاندن و شەهیدکردنی سیپان حوزنی، شەڕڤانی لیوای حەسەکە و هەروەها ڕوداوی ئاگرکەوتنەوەکەی گرتووخانەی کۆبانێ دەربڕدرا.
لە شاری ڕحا، پلاتفۆرمی ڕەنج و دیموکراسی لە بەردەم ئۆفیسی پارتی دیموکراسی و یەکسانیی گەلان (دەم پارتی) کۆبوونەوە و ئەیوب سوروجی، هاوسەرۆکی پارتەکە جەختی کردەوە، ئەم ڕووداوانە هەوڵێکە بۆ تێکدانی ئاشتی و دروستکردنی ئاڵۆزی لە نێوان گەلانی سوریا و داوای کرد تێکۆشان بۆ کۆمەڵگەیەکی دیموکرات و یەکسان بەردەوام بێت.
لە شاری موش و شارۆچکەی کۆپ، سەرەڕای ئاستەنگییەکانی پۆلیس، جەماوەرێکی بەرفراوان ڕێپێوانیان کرد و دروشمی پشتگیرییان بۆ ڕۆژئاوا بەرزکردەوە. لەوێش سڕی ساکک، پەرلەمانتاری دەم پارتی ڕەخنەی توندی لە هەڵسوکەوتی ئاڵۆزکەرانەی پۆلیس گرت و ڕایگەیاند، پێویستە دەست لە دەستپێشخەرییەکانی تێکدانی ئاشتی هەڵبگیرێت.
لە شارەکانی بەدلیس، خەڵات و قۆنیا دەیان هاوڵاتی و بەرپرسی حزبی بە دەربڕینی هەڵوێست و خوێندنەوەی ڕاگەیاندراوی پشتگیریی خۆیان بۆ ئازادی و خۆڕاگریی ڕۆژئاوا دووپات کردەوە.
خۆپیشاندان و ناڕەزایەتی لە چەندین شاری باکووری کوردستان لەسەر ڕووداوەکانی ڕۆژئاوا ئەنجامدرا
