Her çend barana îsal şahiya Newrozê ya li bajarên Dirbêsiyê, Qamişlo, Hesekê û Amûdê yên Rojavayê Kurdistanê dereng xist jî, îro di 24'ê Adarê de bi hezaran şêniyên Qamişloyê li stadyûma 12'ê Adarê amade bûn û Newroza xwe pîroz kirin.
Jin, xort, kal û pîr hemû li qadê bi cil û bergên xwe yên Kurdî amade bûn û li dora agirê Newrozê dîlana xwe gerandin.
Li ser girîngiya bidestxistina mafên Kurdan û mijara entegreyê, Endamê Desteya Hevserokatiya Partiya Yekîtiya Demokratîk Aldar Xelîl di şahiyê de tekezî li ser girîngiya demokrasîkirina Sûriya nû kir.
Di şahiya Newrozê de, me çend nêrîn û peyamên amadekaran girt û tê de daxwaza "yekîtiya Kurdî" li pêş bû.
Endamê Komîteya Amadekar a Newrozê Îbrahîm Hemê diyar kir ku pêvajoya dawî ya li Rojavayê Kurdistanê "dîrok û şoreşeke nû ye" û hêvî kir ku yekîtiya Kurdan a ku li pêş ketiye, dewam bike.
Her wiha, Siysetmedar Telet Yûnis wiha got: "Her sal dijminên me hewl didin ku li pêşiya Newroza me bisekin in.
Tevî ku hemû siyasetên qirkirin û neqebûlkirinê, bi ruhê Mazlûm, Kawa, Ziyad û Ehmed Kerkûkiyan gelê me Newroza xwe pîroz dikin."
Jinên Qamişloyê jî Newroza Kurdan pîroz kirin û tekez kirin ku Newroz cejna wan a neteweyî ye û tevî lehî û barana zêde ya li Kantona Cizîrê jî, ew şahiya xwe li dar dixin.
